PGL – O dia 15 de setembro abriu o prazo de inscriçom nos cursos da Escola Popular Galega. Todos eles som gratuitos, se bem nalguns as vagas som limitadas, polo que será necessário fazer os trámites o antes possível.
Para se inscreverem num curso, as pessoas interessadas apenas deverám enviar umha mensagem electrónica para o endereço correspondente à área do curso, indicar o nome do mesmo, deixar um endereço electrónico de contacto e um número de telefone.
Os cursos configuram-se ao redor de oito grandes áreas, sociologia, história, geografia e ambientalismo, língua, ensino técnico, crianças, comunicaçom e por último trabalho e relaçons laborais.
Em 4 de Outubro terá lugar o primeiro dos cursos, que leva por nome «A criança com apego (parto respeitado, aleitamento, co-leito)», leccionado com colaboraçom com a Associaçom de Pais e Maes ‘Agarimar’. Ministrará-se na sede da EPG em Vigo (Rua Real n.º 12, rés-do-chao) e como docentes estarám membros da Associaçom Deleite.
O seguinte curso, «Relaçons laborais, sindicalismo e movimento obreiro galego» começa em 15 de Outubro e decorrerá as quintas-feiras até 27 de Novembro, também na sede da EPG.
A história colherá o relevo com o curso «História Geral da Galiza», ministrado polos historiadores Antom Santos, Uxio-Breográn Diéguez, Duarte Abade, Xavier Sánchez, Carlos Velasco e Ernesto Vázquez Souza. Será os dias 16 e 17 de Outubro no centro social ourensano Sem um Cam.
Na área de geografia e ambientalismo está programado o curso «Problemáticas ambientais actuais na Galiza», os dias 24 e 31 de Outubro na sede da Escola. Alguns dos docentes confirmados som Pedro Alonso, Xosé Veiras, Tino Constela, Manoel Santos, Begoña Carrero ou Lídia Senra.
A sede da EPG acolherá um curso sobre electricidade doméstica básica que será, em princípio, no mês de Outubro as segundas de 17 a 18:30 horas e as quartas de 20 a 21:30.
O nosso idioma vai ser protagonista em todas as actividades da EPG porque o galego é a língua de comunicaçom da Escola, mas também haverá cursos específicos, como um focado par aa oppulaçom de origem imigrante. Será dous dias por semana de 15 de Outubro a 15 de Dezembro, mas o horário ainda nom está fechado. Há programado um outro de carácter sociolingüístico e que contará como docentes com os professores Bernardo M. Bar, Isabel Suárez, Eduardo Maragoto e Maurício Castro. Será ministrado em Bertamiráns (Ames) no Centro Social A Fouce os dias 27 e 28 de Novembro.
Por último, de 12 a 13 de Dezembro Miguel Garcia ministrará o curso «Introduçom ao desenho gráfico». Por sua parte, Natália Gonçalves fará o próprio com «Introduçom à fotografia», mas a data nom está ainda confirmada. Ambas as actividades serám no Sem um Cam.
ENDEREÇOS ELECTRÓNICOS
Para inscrever-se num curso é necessário enviar umha mensagem electrónica ao endereço correspondente à área do curso, e indicar o nome do curso, um endereço electrónico e um número de telefone de contacto.
Os endereços das áreas som:
- Área de Sociologia: escolapopularsociologia[arroba]gmail.com
- Área de Historia: escolapopularhistoria[arroba]gmail.com
- Área de Língua: escolapopularlingua[arroba]gmail.com
- Área de Comunicaçom: escolapopularcomunicacion[arroba]gmail.com
- Área das Crianças: escolapopularcrianza[arroba]gmail.com
- Área de Trabalho e Relaçons Laborais: escolapopulartrabalho[arroba]gmail.com
- Área de Geografia e Ambientalismo: escolapopulargeografia[arroba]gmail.com
- Área de Ensino Técnico: escolapopulartecnico[arroba]gmail.com
+ Ligaçons relacionadas:
