A ediçom número quarenta do Premio Antón Losada Diéguez distinguiu as obras de Alberto Pombo e Manuel Rivas de entre os trabalhos publicados em 2024. Escolhidos de forma unánime, cada um dos autores recibirá um prémio de 6.000 euros, ademais dumha peça do escultor Acisclo Manzano.
Alberto Pombo, professor de literatura, promotor da iniciativa cultural “Aquí tamén se fala” e ex-diretor deste Portal, foi o ganhador da modalidade de Investigaçom e Ensaio pola sua obra Verso e acorde. Relacións entre literatura galega e música pop (1950-2000), publicada por Edicións Xerais e que parte dumha documentada tese de doutoramento que traz à luz a relaçom entre a música popular (pop, rock, punk, heavy metal, bravú, música infantil) e a literatura galega.
O jurado destacou o contributo ao conhecimento da «outra música» e destacou o tratamento da abordagem histórica com a nova metodologia dos estudos culturais argumentando que: «Desprega ante o público leitor a obra dumha geraçom que soube aquecer o panorama musical do século XX desde o compromiso coa cultura de nosso».
No caso de Rivas, o jurado distinguiu a sua última novela, Tras do Ceo, de Edicións Xerais, como ganhadora da modalidade de Creación Literaria, destacando a qualidade literária e linguística dumha obra que, recuperando elementos já clássicos na produçom do autor, constrói um universo narrativo atual e pom o foco no choque entre a natureza e umha civilizaçom que se revela como destrutora do hábitat que nos fai seres humanos.
O jurado foi constituído por Diego Fernández Nogueira (concelheiro de Cultura do Carvalhinho que atuou como presidente), Patricia Torres (alcaldesa de Boborás), César Fernández (Deputado provincial de Cultura) Lourenzo Fernández (da Real Academia Galega); Dolores Vilavedra (do Consello da Cultura Galega); María Xosé Fernández (do Museo do Pobo Galego); e por Antonio Salgado, Benigno Salgado e Carme Fernández (coma representantes respectivos das universidades de Santiago, Vigo e A Corunha, respectivamente).
