PGL País Basco – O sindicato de camionistas do País Basco, Hiru, tem explicado que no passado 15 de Setembro agentes da Guarda Civil detiveram em Jaén o veículo de um camionista basco, ao que lhe solicitaram os discos do tacógrafo para revisar se estava em ordem.
O camionista apresentou os discos do tacógrafo nos quais aparece correctamente consignada a data, em basco, cuja ordem é diferente ao castelhano.
Hiru assinala que a Policia civil interpretou que apontar a data na língua do País Basco no disco tacógrafo é “umha falsificaçom de folhas de registo”, como se recolhe na denúncia.
Por isso, impôs ao camionista umha multa de 4.601 euros. O trabalhador tem recorrido, explicando que as datas marcadas nos discos som correctas e que a ordem no qual se consigna a data corresponde à língua na qual se expressa o camionista, que é o basco.
A Conselharia das Obras Públicas e dos Transportes da Junta da Andaluzia respondeu no passado 15 de Janeiro avalizando a denúncia da Guarda Civil e denegando o recurso.
Hiru considera que a denúncia apresentada e a decisom da Junta de Andaluzia “nom têm justificativa algumha” e produzem “umha vulneraçom absoluta a todos os camionistas estrangeiros que circulam pelas estradas andaluzas”.
