A Mesa pola Normalización Lingüística convoca umha concentraçom na próxima sexta-feira, dia 4 de abril às 9h30, diante do julgado de Padrom, em solidariedade com Marcos Maceira e Sara Seco, acusadas dum suposto delito de injúrias por denunciarem diante dos meios e nas redes sociais um atestado no que a polícia municipal de Rianjo afirmava que os trabalhadores públicos “nom tinham obriga de falar em galego”.
O presidente da Mesa, Marcos Maceira, e a tiktoker Sara Seco declararám em qualidade de pessoas investigadas, por defenderem o direito dum vizinho de Rianjo a ser atendido na nossa língua. Maceira e Seco denunciaram perante os meios de comunicaçom e nas redes sociais um atestado no que a polícia municipal de Rianjo, perante a solicitude de atençom em galego dum cidadám, afirmava que “na Galiza o castelhano é umha língua igualmente oficial” e que “nom tinham obriga de lhe falar em galego”, polo que foi advertido “mui seriamente, para abandonar essa atitude”. Acto seguido, a polícia propujo o cidadám para sançom por alterar gravemente a ordem no centro de saúde, infraçom administrativa da que foi absolvido.
Para a Mesa, a denuncia policial é “um ataque à liberdade de expressom e de opiniom” e “mais um passo no intento dos responsáveis policiais de Rianjo de intimidarem e amedrontarem a quem se atreva a assinalar as atitudes hostis cara a língua galega”.
“Essa atitude ficou clara no processo judicial contra o cidadám que reclamou o seu direito à atençom em galego”, afirmam, “e agora a denunciar destacados membros da Mesa por reproduzirem a literalidade dum atestado policial e dumha resoluçom sancionadora da Subdelegaçom do Governo na Corunha”. Neste sentido, A Mesa reafirmou a sua vontade de continuar a defender qualquer pessoa que veja vulnerado o seu direito a usar o galego sempre e em qualquer lugar.
