PGL – A Conselharia do Meio Rural acaba de confirmar que esbanjou quase 9.000 euros na ediçom do livro Herramientas silvícolas para la gestión sostenible en Galicia. Da própria Junta defendem a ediçom por enquanto só em espanhol para lograr repercussom internacional.
Também aduzem que mesmo antes da publicaçom chegar a ser impressa recebêrom, supostamente, um importante número de consultas e solicitudes sobre a obra procedentes de fora do País.
Em resposta escrita ao grupo parlamentar do BNG, a Conselharia do Meio Rural confirma que para a Junta o galego é só umha língua regional, sem importar que isto esteja em contradiçons com afirmaçons anteriores do próprio Feijóo, quem tinha situado a nossa língua no mundo como parte do universo Lusófono.
Do departamento que chefia Samuel Juárez acham que com a ediçom em castelhano se aproveita a «vantagem» que implica «a sua importante divulgaçom fora do território galego, e ao prestígio que, deste modo, alcança a Galiza, com um livro de referência internacional».
Ao tempo que confirma que o custo oficial da publicaçom foi de 8.742,38€ —sem incluir, porém, os de publicitaçom e distribuiçom, nom desvendados polo de agora— a Junta aclara que «nom se desbota fazer umha ediçom em galego». Cumpre lembrar que mesmo esta consideraçom do galego como segundo prato mesmo vulnera o espírito da Lei de Normalizaçom e do Plano Geral de Normalizaçom Lingüística, que situam a nossa língua como de uso normal e habitual por parte das Administraçons.
+ Ligaçons relacionadas:
- Leite galego 100% e em galego 0% [PGL, 19/07/2010]
- A Junta ‘coneta’ em espanhol, nas ondas e no papel [PGL, 28/05/2010]
- O BNG pergunta pola discriminaçom do galego no comércio, a justiça e o meio rural [PGL, 21/04/2010]
- Feijóo coloca o galego na Lusofonia [PGL, 19/10/2009]
