PGL – A Rede Galega de Empresas, com o apoio da Deputaçom de Lugo, organiza no próximo sábado, dia 29, umhas jornadas no Museu Provincial sob o epígrafe «A indústria cultural nos países lusófonos». Este rede tem experiência em projetos de colaboraçom e internacionalizaçom de empresas, com representaçom em países lusófonos como Angola, Brasil, Portugal ou Sam Tomé.
Dentro deste grupo de empresas há pequenas e médias, e abrange todo o tipo de atividade económica. Desde 2003 realiza açons de cooperaçom entre os seus sócios, partilhando projetos económicos e promovendo encontros intersetoriais. Por exemplo, em 2010 realizou seminários sobre aspectos económicos com Brasil, Uruguai e Angola focados a tornarem internacionais as nossas relaçons empresariais.
Desta vez, o seminário é referido à industria cultural dos países lusófonos, aspeto de grande importáncia quer no ámbito económico, quer no apoio do mundo empresarial às caraterísticas próprias e definidoras deste nosso espaço comum.
Objetivos
Os objetivos gerais do evento som:
– Promover a difusom do conhecemento, experiências e inovaçons no âmbito da industria cultural dos países do entorno lusófono.
– Colaborar e cooperar entre os participantes através de acordos que procurarem conjugar os interesses de todos os países integrantes, tanto na indústria cultural quanto no espaço instituçional, embora sem esquecerem as particularidades específicas de cada qual.
– Facilitar a relaçom fluida entre as administraçons dos países que integram este espaço com a indústria cultural com o intuito de atingir um ótimo desenvolvemento e maiores potencialidades em ambos planos, externo e interno.
– Interrelacionar diversas actividades económicas com o nosso mundo cultural tratando de melhorar o conhecemento específico de cada sociedade.
– Ir à procura de todas aquelas oportunidades de cooperaçom e formaçom de parcerias que for preciso no espaço das indústrias culturais.
Aspeto fulcral para a normalizaçom
É um aspecto fulcral para a normalizaçom do nosso idioma termos a certeza de que todos os espaços ou ámbitos onde se desenvolve a sociedade devem ser parte interessada na defesa, preservaçom e fomento da nossa língua. Portanto, é também muito necessário que o mundo da empresa seja um desses espaços, especialmente graças às imensas possibilidades que nos oferece termos umha língua comum, partilhada com milhões de pessoas.
Este potencial de comunicaçom permite-nos comunicar e trocar conhecimentos, ideias, projectos, processos, objetivos no mundo da empresa para umha ótima evoluçom, avanço e desenvolvimento da nossa economia.
