Conheces a Semente? Somos a iniciativa comunitária que está a criar centros de imersom lingüística na Galiza, para garantir que as nossas crianças podam crescer na nossa língua.
As nossas crianças -já falem sempre em galego, mais em galego, mais em castelhano ou sempre em castelhano quando entram na Semente- vivem em galego nas nossas escolas, com umha planificaçom de imersom e de conservaçom do idioma que demonstra que é possível mudar a história: transformar.
Na Semente estamos a viver isso, sentimos a mudança social no dia-a-dia. Temos um projeto no qual cremos, confiamos e que nos demonstra que é possível o que antes só podíamos imaginar. Demos o passo e aqui estamos. Sim, com inseguridades, em precário, mas sentindo que, do movimento social de base, estamos a construir um caminho novo que partilhamos com muita muita gente que colabora e fai parte deste projeto coletivo, social, auto-gerido, popular.
É possível porque as Sementes crescem como um projeto de participaçom social no qual educadoras, mamás, papás, ativistas e gente colaboradora conseguimos criar um espaço de socializaçom e aprendizagem em galego ou português da Galiza. Um espaço que vai além das nossas salas de aulas e das nossas hortas. Um espaço que se constrói com vontade e trabalho coletivo. Há uns meses repartíamos na manifestaçom pola defesa do idioma uns textos nos quais che contávamos como nos ia e onde compatilhávamos umha reflexom sobre a estratégia de normalizaçom que levamos adotando nos últimos 40 anos. Nós chegámos à conclusom de que é umha estratégia errada. Dizíamos:
“Nom tés certa sensaçom de déjà vu? Mais um ano a berrar na defesa do nosso idioma, demandando a sua presença na administraçom, nas televisons, na imprensa, em todo; votando nos partidos que defendem o seu uso, indignando-nos com as pessoas e instituiçons que nos discriminam por usá-lo e lendo nos meios digitais como desaparece. E chegam as eleiçons e sai a mesma gente. Ou nom, mas botam-nos ao pouco, e outra vez na mesma, cada vez mais frustrados e frustradas, mais inofensivos e inofensivas.”
E instávamos-te a sair deste círculo vicioso, a nom ficares só no protesto nem na teima eleitoral e participar na criaçom e desenvolvimento de iniciativas comunitárias que normalizem o uso do galego. A nossa chama-se Semente. Estamos a criar o nosso próprio modelo educativo: educamos na coeducaçom, na laicidade, na interaçom com a natureza, respeitando os ritmos das crianças, no assemblearismo, na justiça social e, portanto, em galego. Porque a Semente é um centro infantil de imersom lingüística, de 2 a 6 anos.
Começamos com 3 crianças há quatro anos. Há 5 meses, aquando a manifestaçom pola língua, tínhamos 22 alunas e alunos em Compostela. Hoje, depois do período de preinscriçom, abrimos a segunda escola em Compostela, onde temos 35 matrículas, e ainda abrimos umha escola em Vigo, com 8 crianças, e umha outra em Trasancos, com 7.
Somos 50 famílias, umha pinga de azeite num oceano, mas umha pinga que se está a fazer mais grande, da qual nos orgulhamos e pola qual damos por bem empregados estes 4 anos de ativismo que conformárom umha escola de qualidade. Umha escola que cresce e melhora dia após dia. Queremos pedir-che que colabores connosco, que nos ajudes a crescer em Compostela, a enraizar em Vigo e Trasancos, e a sementar e prender em todos os recantos da Galiza.
Neste 25 de Julho, a Semente quer berrar polas mil primaveras mais para a nossa língua, e pola criaçom de iniciativas que construam um futuro para a geraçom das mil primaveras mais. Queremos que cresças connosco.
NOTA: artigo publicado no Fest-AGAL n.º 6 (julho de 2015)
