PGL – No passado sábado, dia 19 de dezembro, tivérom lugar umha Assembleia Extraordinária e umha outra Ordinária da AGAL, cujos pontos de máximo interesse fôrom no primeiro caso umha proposta de mudança de estatutos e, no segundo, o projecto de orçamentos para 2010.
No que atinge à mudança de estatutos, 91,8% das pessoas assistentes concordárom com substituir o texto do artigo 19.0. Desta maneira, a velha redacçom («Os cargos que componhem o Conselho serám gratuítos, sem prejuízo do direito de serem reembolsados das despesas devidamente justificadas, e deverám carecer de interesse económico nos resultados da actividade por si mesmos ou por pessoa interposta») foi mudada por:
Consoante ao artigo 11.5 da Lei orgánica 1/2002, de 22 de março, reguladora do direito de associaçom, os membros do Conselho poderám receber retribuiçons em funçom dos seus cargos. O montante de tais retribuiçons deverá constar nos orçamentos anuais aprovados em Assembleia Geral.
Os membros do Conselho tenhem o direito a serem reembolsados das despesas económicas causadas polo exercício dos seus cargos, desde que sejam devidamente justificadas.
Segundo defendeu o presidente da AGAL durante a Assembleia Extraordinária, graças ao novo texto habilita-se um importante mecanismo para continuar na linha de profissionalizaçom que a Associaçom iniciou há vários meses e que permitirá ao Conselho executar o programa com que se apresentou no passado mês de junho.
Assembleia Ordinária
Por outra parte, a proposta de orçamentos também contou com um amplo apoio, que ascendeu a 95% dos votos emitidos na Assembleia Ordinária, e que representarám o sustém económico dos diferentes projectos que a AGAL apresentará durante 2010.
Outros pontos tratados na Assembleia Ordinária fôrom a revista Agália —de cuja nova etapa se adiantárom algumhas informaçons, assim como dos trabalhos actuais—, o envolvimento de sócias e sócios em diferentes equipas de trabalho da Associaçom, a área editorial da AGAL —mediante o selo Através Editora, com vários títulos programados para o primeiro semestre do vindouro ano—, as iniciativas da novidosa área de audiovisual, assim como os diferentes projectos da área de internet que começaráma a ver a luz a partir de janeiro de 2010.
+ Ligaçons relacionadas:
