Nationalia – Numha votaçom histórica nesta sexta-feira 17 de maio, a Assembleia da Córsega aprovou um estatuto de co-oficialidade para língua corsa. A aprovaçom do estatuto obtivo a unanimidade dos membros da Assembleia presentes no momento da votaçom.
Assim, 36 membros apoiárom a equiparaçom legal do corso e o francês, ao passo que 11 nom quigérom participar no voto e 4 estavam ausentes (estes 15 deputados pertencem à oposiçom de direitas e a umha pequena fraçom do centro-esquerda governamental), segundo explicam France 3 Corse na sua conta de Twitter e na rádio corsa Alta Frequenza, que acrescenta que houvo umha deputada da direita que votou em favor.
Como já anunciaram, tanto os autonomistas da Femu a Corsica quanto os independentistas da Corsica Libera votárom em bloco em prol do estatuto de co-oficialidade, bem como a maioria dos deputados do centro-esquerda, que governa na ilha.
Ficárom confirmadas assim as previsons que Pierre Ghionga, presidente do Conselho da Língua Corsa e redator da proposta de co-oficialidade, fazia há apenas um mês, quando prognosticava umha “forte maioria ” em favor de outorgar caráter oficial à língua própria da ilha. Como referíamos na altura, a votaçom da Assembleia da Córsega nom outorgaria automaticamente a oficialidade ao corso. É preciso lembrar, com efeito, que esta cámara nom tem poderes legislativos e que, em qualquer caso, terá de ser a Assembleia Nacional francesa que vote umha lei – ou mude a Constituiçom, chegado o caso – que outorgue caráter oficial ao corso.
Ghionga considera que seria inconcebível que a República Francesa se opugesse “à vontade democrática dumha regiom “. Agora, portanto, a bola está no campo de Paris.
Administraçom e escola
A administraçom e a escola som os dous grandes pilares sobre os quais o diploma legal prevê arquitetar a oficialidade do corso. Por umha parte, o estatuto de co-oficialidade consigna que os dous idiomas deverám poder ser usados pola cidadania nas suas relaçons com a administraçom pública. E por outro, o diploma prevê a introduçom geral do corso como língua veicular nas escolas, com o objetivo de abranger umha populaçom ilhoa totalmente bilingüe.
Córsega/Corsica
Dados gerais
- Populaçom: 279.000 habitantes (2006)
- Superfície: 8.860 km2
- Instituiçons: Conselho Executivo da Córsega e Assembleia da Córsega
- Cidades importantes: Aiacciu, Portu-Vecchjiu, Bastia
- Administraçom estatal: França
- Língua territorial: corso e lígure
- Língua oficial: francês
- Data da festa nacional: 8 de dezembro
- Cultura religiosa: cristá católica
