A Faculdade de Ciências Económicas da USC acolheu a estreia do documentário da Associaçom Galega da Língua ‘O diamante galego’, em que se analisam as relações económicas, culturais e institucionais entre a Galiza e o Norte de Portugal. Realizado por Nós Televisión e com o apoio da Deputación da Coruña, esta obra procura divulgar entre a sociedade galega o atual dinamismo da Eurorregião Galiza-Norte de Portugal e o potencial que a sua consolidaçom tem tanto para a língua galega como para o bem-estar da cidadania.
Apresentado polo escritor Tiago Alves, participam neste documentário diversas personalidades do mundo da política, dos negócios e da sociedade civil de ambos os lados da fronteira: o filósofo Antón Baamonde, autor do livro Unha nova Olanda; Teresa Táboas, arquiteta e Vicepresidenta da Uniom Internacional de Arquitetos; Pedro Puy, deputado do Partido Popular no Congresso dos Deputados; Xoán Vázquez Mao, Secretario Geral do Eixo Atlántico; o Director Xeral de Relacións Exteriores e com a UE da Xunta da Galiza, Jesús Gamallo Aller; Daniel González Palau, Diretor do IGADI; Enrique Sáez Ponte, Presidente da Fundación Juana de Vega; a alcaldesa de Tominho, Sandra González e o de Vila Nova de Cerveira, Rui Teixeira; António Cunha, Presidente do CCDR-N (Região norte de Portugal); o economista e professor da USC, Diego Sande Veiga; o Vicepresidente da Confederação Empresarial de Portugal pola APICCAPS, Manuel Carlos Silva; Jorge Cebreiros Arce, Presidente da Confederação Empresarial de Ponte Vedra; Alberto Rocha Guisande, Secretario Geral da Confederação de Industrias Têxteis da Galiza e o empresário galego José Ramom Pichel Campos.
O evento, que decorreu na Faculdade de Ciências Económicas da USC o passado 14 de fevereiro, contou com a presença de Jon Amil, presidente da AGAL, Mercedes Roson do Grupo Socialista do Concelho de Santiago e de José Lago da Dirección Xeral de Relacións Exteriores da Xunta da Galiza. Após a exibição do documentário houve um colóquio entre o público e algumhas das pessoas entrevistadas e que estavam também presentes como o Presidente da Confederación de Empresarios de Ponte Vedra, Jorge Cebreiros, o economista Diego Sande, o ensaísta Antón Baamonde e o empresário José Ramóm Pichel.
