PGL – Neste ano 2011 a Associaçom Galega da Língua (AGAL) cumpre 30 anos de luita por «conseguir umha substancial reintegraçom idiomática e cultural do galego (nomeadamente nas suas manifestaçons escritas) na área lingüística e cultural que lhe é própria: a galego-luso-africano-brasileira», como indicam os seus estatutos.
Embora a história do reintegracionismo é bem anterior, o germolo da associaçom só chegou em maio de 1981. Naquela altura houvo várias reunions em Santiago de Compostela, fruto das quais chegou o compromisso de constituir a Associaçom Galega da Língua para dar resposta aos problemas do nosso idioma, ao qual, com a aprovaçom do Estatuto de Autonomia da Galiza, se lhe abria umha nova etapa.
A 9 de junho do mesmo ano, na cidade da Corunha, foi redigida a Ata Fundacional. Como membros da Comissom Fundacional estavam Xavier Alcalá, António Gil Hernández, Manuel Miragaia, José Maria Monterroso e Joám Carlos Rábade.
Poucos meses depois, a 2 de outubro, a associaçom foi legalizada polo Ministério espanhol do Interior, e a dia 31 tivo lugar a Assembleia Fundacional, em Santiago de Compostela, na sede da Associaçom Dom Bosco.
Já a 19 de dezembro de 1981 resultou eleito o primeiro Conselho, presidido por Xavier Alcalá Navarro. Durante estes 30 anos de vida a associaçom tivo também à frente da presidência Maria do Carmo Henriques Salido, Bernardo Penabade Rei, Alexandre Banhos Campo e, desde o verao de 2009, Valentim Rodrigues Fagim.
Atividades
A AGAL celebrará o 30º aniversário com diversas atividades, as quais irám sendo anunciadas durante os próximos meses. Do PGL começamos hoje mesmo adaptando o cabeçalho do Portal para a ocasiom.
+ Ligaçons relacionadas:
