PGL – Da quarta-feira dia 15 de Julho ate a sexta-feira dia 17, terá lugar no Paço da Cultura de Carvalho o V curso de Verao sobre dinamizaçom lingüística.
No acto de apresentaçom das jornadas, previsto para as 10:15 horas de hoje no Paço da Cultura, intervirám o secretário-geral de Política Lingüística da Junta da Galiza, Anxo M. Lorenzo Suárez; o deputado responsável de Normalizaçom Lingüística da Deputaçom da Corunha, Xoán M. Sande Muñiz; o presidente da cámara de Carvallo, Evencio Ferrero Rodríguez; a directora do Serviço de Normalizaçom Linguística da Universidade da Corunha, Goretti Sanmartín Rei; e o presidente da Coordinadora de Trabalhadores/as de Normalizaçom da Língua (CTNL), Nel Vidal Barral.
Apesar de que algumha das sessons precisa de inscriçom prévia, há actos e actividades abertos ao público em geral, tal que as conferências do sociolingüista Miquel Strubell, a do juiz Luís Villares e a da professora Pilar Freitas, a representaçom da obra de teatro Comédia bífida, de Manuel N. Singala ou a exposiçom Crónicas da repressom lingüística.
Entre os conferenciantes que assistirám e ministrarám os cursos em Carvalho, encontram-se a professora Maria do Pilar Garcia Negro, Goretti Sanmartin ou Luís Villares Naveira, co-autores da obra Sobre o racismo linguístico, da que falámos há escassos dias no Portal Galego da Língua.
+ Ligaçons relacionadas:
