PGL – A Real Academia Galega (RAG), após ser consultada pola Junta da Galiza, manifestou o seu total desacordo com o rascunho do Decreto do galego apresentado no passado 30 de dezembro e que tanta controvérsia tem criado nos últimos tempos.
Assim, a RAG, que postergou a eleiçom do novo presidente até emitir informe sobre o anteprojecto, dedicou o primeiro plenário do ano a tratar este assunto.
Manuel González, que exerce como presidente em funçons, explicou que todas as opinions fôrom «muito críticas, sem excepçom», destacando que a maior parte dos académicos nom entrárom nem em «valorizar a posibilidade de emendar o rascunho».
Umha comissom de estudo formada por Xosé Luís Axeitos, Víctor Freixanes, Manuel Rivas, Francisco Fernández Rei e Xesús Ferro Ruibal sintetizará nos próximos dias as achegas dos académicos. Ainda, o plenário reunirá-se outra vez, possivelmente nesta mesma semana, para aprovar o documento que se trasladará ao Executivo.
Nesta linha, González recusou valorizar as declaraçons do responsável de Política Lingüística, Anxo Lorenzo, quem dias atrás falou de umha «maioria silenciosa» que justifica o decreto contra «os sectores mais extremistas», e explicou que a RAG nom é «nengum sector extremista» e que o seu informe «será sério e ponderado».
