PGL – A Real Academia Galega (RAG), presidida por Xose Luís Méndez Ferrín, baseará-se no português brasileiro para a procura de neologismos relativos à disciplina das Ciências do Solo. Segundo o escritor ourensano, isto responde a razons de «prática e tradiçom».
Estas declaraçons fôrom realizadas após a RAG assinar um convénio com a Sociedade Espanhola Ciências do Solo, cujo objectivo é a criaçom dum glossário de termos desta disciplina científica, que se estuda desde o século passado.
A SECS dispom dumha plataforma terminológica com 2.500 vozes. O glossário é de acesso gratuito e poderá-se consultar em linha. O labor da Real Academia Galega vai ser o de assessorar os científicos nos campos da normalizaçom e normativizaçom. No entanto, o projecto contempla tanto as equivalências do vocabulário, como também a realizaçom de definiçons dos distintos termos, para que podam ser incluidos em próximas ediçons do dicionário da RAG. Os termos também podem consultar-se em catalám, euscara, inglês e francês.
O modelo será o português do Brasil. Segundo Ferrín, muitas palavras novas poderám atopar-se na terminologia brasileira, tanto pola “prática e tradiçom” existente a respeito como polo facto de ser o esse país “umha potência em Ciência do Chao [sic]”. Ferrín também quijo destacar o vencelho entre a “vanguarda” dos científicos de disciplinas relacionadas com a natureza na Galiza e a “preocupaçom pola língua”, à vez que manifestou a sua vontade de incorporar ao idioma a terminologia das ciências.
+ Ligaçons relacionadas:
- “Por práctica e tradición” [Galicia Hoxe, 12/07/2010]
- O glosário multilíngüe das Ciências do Solo [A Nosa Terra, 12/07/2010]
