PGL – Com motivo de umha informaçom publicada no Portal, o grupo parlamentar do BNG perguntou à Junta pola publicaçom só em castelhano de um documento com as tarifas publicitárias da Rádio Galega, disponível no site web da CRTVG.
Como dizíamos nessa informaçom, atualmente é possível consultar no site da Companhia de Rádio/Televisom da Galiza as tarifas publicitárias da TVG e mais da Rádio Galega. Porém, no caso desta última, apenas se pode ler a documentaçom em espanhol, o qual resulta mesmo chocante com o caráter normalizador que deve ter o meio público, como recolhe também umha das considerações finais do texto: «La publicidad se emitirá en gallego. El servicio de doblaje es gratuito».
Este facto, do qual tivemos conhecimento através de umha leitora do PGL, encontra-se com contradiçom com a Lei de criaçom do ente público galego, como assinalam os deputados Bieito Lobeira e Anxo Quintana, quem consideram «escandaloso», pois a Lei de Criaçom da CRTVG (Lei 9/1984, de 11 de julho) assinala no artigo 16 que a companhia tem como um dos seus princípios «a promoçom e difusom da Cultura e Língua Galega, assim como a defesa da identidade da nacionalidade galega». Os nacionalistas denunciam esta «atitude de veto» ao idioma que fundamenta a existência da própria CRTVG.
Os deputados reclamárom informaçom à Junta da Galiza acerca desta exclusom do nosso idioma, e solicitárom conhecer se está previsto corrigir a situaçom e em que prazo.
+ Ligações relacionadas:
