PGL – A Subdelegaçom do Governo em Ponte Vedra comunicou umha sançom económica de 500 euros à plataforma Queremos Galego por ter convocado umha concentraçom em Vigo, mesmo apesar de que nom houvo alteraçom da ordem nem do tráfego.
O Grupo Parlamentar do Bloco Nacionalista Galego (BNG), através de Bieito Lobeira, já levou à Câmara galega o assunto. Segundo se assegura no documento entregado à Mesa do Parlamento, o delito advertido polas forças policiais e a Subdelegaçom do Governo consiste em que durante umha hora se gritárom frases, exibírom-se bandeiras galegas ou mesmo havia um cartaz que rezava «Temos língua própria e queremo-la falar». Para o BNG, esta argumentaçom «é tam surrealista como insultante, ademais de escandalosa do ponto de vista democrático», e destaca o facto de a notificaçom estar redigida em espanhol.
A concentraçom tivera lugar na rua Príncipe de Vigo, e decorreu com total normalidade. Para Lobeira «resulta quase grotesco ter que lembrar no ano 2010 que defender o galego nom é um delito», e acha que «a questom é assustar, criminalizar e meter medo aos defensores do galego». Deste modo, «a involuçom democrática vai da mao, neste caso, da profunda involuçom lingüística».
+ Ligaçons relacionadas:
