PGL – Por segundo ano consecutivo, o circuito volve percorrer Portugal e a Galiza através de umha alargada rede de espaços que abrem portas à música que se fai além e aquém Minho.
Entendido como um grande evento dedicado ao pequeno formato, o festival terá lugar em espaços nocturnos e intimistas (bares, cafés, concertos ou associaçons culturais) apostando por umha programaçom de qualidade e por umha grande variedade de estilos musicais.
Com a participaçom de vários grupos portugueses do OuTonalidades na Galiza, e com a presença no circuito português de grupos da Rede Galega de Música ao Vivo, mais um ano, o festival contribuirá para a promoçom cultural de cada país na outra beira do rio.
No dia 16 deste mes, o evento será apresentado como exemplo de boas prácticas no congresso espanhol das salas de música ao vivo, em Vic, na Catalunha. Cabe destacar, que este ano, o OuTonalidades será apresentado em dupla conferência de imprensa, a 21 de Setembro em Lisboa e a 23 em Santiago de Compostela.
O festival, activo durante 13 fins-de-semana, entre 24 de setembro e 19 de dezembro, terá lugar em 24 espaços de música que oferecerám um cartaz com propostas diversas que vam do jazz ao tradicional, do rock ao fado, do ska aos blues ou do experimental às músicas do mundo.
Os organizadores adiantárom que este ano 217 grupos portugueses e galegos se inscrevêrom, ficando numha primeira fase 95 pré-seleccionados. Finalmente, os organizadores reduzírom o número até os 33 grupos que farám os 74 concertos do circuito. Assim, nesta ediçom de 2009, o evento cresce em número de espaços, de grupos e de concertos programados, tanto em Portugal como na Galiza.
Com o intercâmbio cultural deste ano, haverá 7 grupos portugueses na Galiza e 11 grupos galegos em Portugal, num total de 47 concertos em regime de intercâmbio.
+ Ligaçons relacionadas:
