PGL Países Cataláns – O Sindicato de Trabalhadores do Ensino do País Valenciano (STEPV) denunciou que a convocatória da Conselharia de Educaçom para cobrir vagas de professores de valenciano de secundária e da Escola Oficial de Idiomas (EOI) deixa fora os filólogos cataláns.
Nom se lhes reconhece oficialmente o título requerido. Entre os requisitos para aceder às vagas há que ser licenciado em filologia valenciana, hispánica ou na secçom filologia valenciana de Filosofia e Letras. Segundo o STEPV, nengumha pessoa com a titulaçom de Filologia Catalá, a única que tramitam as universidades desde 1993, pode ser admitida na bolsa.
O sindicato acusou o governo valenciano e o seu conselheiro para a Educaçom de ter umha «obsessom enfermiça» para evitar que esta titulaçom seja reconhecida oficialmente.
O STPEV recordou as sentencias do Tribunal Superior para a Justiça da Comunidade Valenciana sobre o reconhecimento da titulaçom de Filologia Catalá para ministrar aulas e explicou em comunicado que estará atento à evoluçom da bolsa. Também assegurou que «velará» para que nengum filólogo em língua catalá fique excluído por culpa da sua titulaçom e que de ser necessário empreenderá acçons legais para restituir o direito dos afectados.
+ Ligaçons relacionadas:
