PGL – Onze autores galegos, galardoados com o Prémio Nacional de Literatura que concede o Ministério, juntárom-se pola primeira vez para pedir a demissom do conselheiro de Cultura, Roberto Varela, depois de este proferir continuadas faltas de respeito à cultura galega.
Nos poucos meses que leva ocupando o cargo, Varela proferiu sentenças sobre a cultura galega como: «está ensimesmada e acomplexada», «limita», «é um tema espinhento» ou «a maior parte dos livros que se editam na Galiza compra-os a Junta».
Na missiva, os autores exigem a dimissom imediata do conselheiro de Cultura pola sua «falta de consideraçom» e o seu «escasso conhecimento» da cultura que se fai na Galiza.
Perante a referida falta de respeito e diplomacia do conselheiro, profissional das relaçons institucionais, decidírom elaborar e assinar a carta Manuel Rivas, Suso de Toro, Alfredo Conde, Agustín Fernández Paz, Xabier P. do Campo, Xusto Beramendi, Paco Martín, Antón Santamarina, Fina Casalderrey, Manuel Lourenzo e Rubén Ruibal.
«Nom se trata de explicar ao conselheiro de Cultura o que é obvio, mas lembrar-lhe que dizer certas cousas nom é de graça. Classificar como acomplexada e ensimesmada a cultura é tam grave como se o titular de Méio Rural afirmasse que é preciso deixar de produzir vinho na Galiza porque é cativo e nom serve, e que devemos importá-lo de fora. Nom se pode deixar passar algo assim», explica o escritor Suso de Toro. Por sua vez, Agustín Fernández Paz, explicava que as «faltas de respeito de Varela nom som novas».
O conselheiro de Cultura, que está a receber inúmeras críticas da oposiçom e até do próprio Partido Popular polo escasso protagonismo que concedeu à cidade de Santiago na promoçom do Jacobeu, descartaou rotundamente a possibilidade da sua dimissom, argumentando que nom conhecia o conteúdo do documento referido.
+ Ligaçons relacionadas:
