PGL – No serao da vindoura terça-feira, 22 de Junho, desenvolve-se o I Mercado de Verao, denominado “Entre lusco e fusco”. Será no parque de Belvis, situado ao pé da Zona Histórica compostelana e da rua de Sam Pedro.
No mercado “Entre Lusco e Fusco” poderám-se encontrar produtos frescos e de temporada de origem ecológica, local e comércio justo. Também terá lugar um mercado de troco e de artesaos. Para amenizar a jornada haverá actuaçons musicais e de baile.
A programaçom começa com a inauguraçom, com apresentaçom e pregom do duo Mini e Mero. Às 19:30 terá lugar o mercado de troco, organizado pola associaçom ambientalista Verdegaia e umha sessom de contacontos da Barafunda Animacións. Às 20 horas Brincadeira e a Associaçom vicinal Juntanza tocarám e dançarám para continuar a festa.
Umha hora mais tarde o Grupo de horticultura ecológica Hortinha da Ponte de Forcarei (Terra de Montes) ministrará um obradoiro de produtos de temporada. Para encerrar, às 21,30 horas e às 22 horas actuarám respectivamente o Coro da rá e Caixa de Tambora.
+ Ligaçons relacionadas:
- Cartazes do Mercado de Verao “Entre lusco e fusco” (cara 1 e cara 2)
- Blogue do Mercado “Entre lusco e fusco”
