SCD Condado – Este fim-de-semana celebra-se o XXV Festival da Poesia no Condado, que se dedica às luitas feministas baixo o lema ‘Sem as mulheres nom há revoluçom’.
Como cada ano, a Sociedade Cultural e Desportiva (SCD) do Condado oferece um dilatado programa no que cultura, reivindicaçom e festa se unem no recinto amuralhado de Salvaterra de Minho.
Noite nas Minas
O Festival começa esta sexta-feira, dia 2 de setembro, inaugurando as exposiçons de pintura, vídeo-criaçom, escultura e fotografia às sete e meia da tarde. A continuaçom vai-se projectar o filme Umha pola outra (Coup pour coup, Marin Karmitz, 1972), no que se narram as particularidades da luita operária dentro de umha fábrica em que as trabalhadoras som todas mulheres.
Por último, o grupo De Outra Margem e a poeta Maria do Cebreiro protagonizam a Noite nas Minas, que arranca às dez e meia da noite. Este evento é o único de pagamento do festival, devido ao aforo limitado das Covas de Dona Urraca. Podem-se reservar entradas, a dez euros, escrevendo a info[arroba]scdcondado.org ou ligando para o 986 658 036. Ao remate haverá petiscos e repichoca.
Actividades toda a jornada do sábado
Desde as onze e meia da manhá do sábado as ruas e paróquias de Salvaterra de Minho vam estar animadas por passa-ruas e as viagens do comboio de baixa velocidade, que também cruzará o Minho para percorrer Monção. A feira de coletivos e artesanato começará também de manhá, assim como o jogo da bilharda, com o Aberto da Poesia, que a SCD organiza em colaboraçom com a Liga Nacional de Bilharda desde as doze e meia.
A Casa do Conde acolhe outra das actividades mais intimamente relacionadas com o lema do festival. Os colectivos feministas Marcha Mundial das Mulheres, Mulheres Nacionalistas Galegas, Assembleia de Mulheres do Condado, Nomepisesofreghao e Rede Feminista Galega vam protagonizar um debate sobre a atualidade das luitas feministas a partir da umha do meio-dia.
Pola tarde o protagonismo vai ser dos nenos e nenas, com a Festa Infantil, na que vai haver obradoiros e a atuaçom de Paula Carballeira. E, desde as sete e meia, vam-se projetar os trabalhos premiados no vizinho Festival de Cans, ademais da curta de animaçom Gato Encerrado, de Peque Varela.
Poesia e música desde as nove do serao
O duo de cantantes e cómicos Os da Ria vai ser o encarregado de conduzir o evento central, o Festival Poético e Musical, que começa às nove do serám do sábado. A primeira intervençom será a da poeta e jornalista Ana Romaní, que vai ler, a modo de pregom, o limiar da sua autoria do livro que a SCD edita a modo de escolma de todos e todas as poetas participantes neste Festival. O volume, que se pode adquirir no Festival, contém textos de todas as poetas que vam participar no recital: Andrea Nunes Brións, Claudio Pato, Iolanda Aldrei, Lorena Souto, Manuel Darriba, Maria Rosendo, Paula San Vicente, Séchu Sende e Xosé Mª Álvarez Cáccamo. Também de María do Cebreiro, que recita na sexta-feira, e da portuguesa Catarina Nunes, que finalmente nom vai poder estar em Salvaterra, mas que igualmente remeteu os seus textos para a publicaçom.
No apartado musical, a primeira será umha breve atuaçom do grupo de música tradicional Habelas Hainas, que também vam estar amenizando a festa tocando a rés-do-chao. Depois subirá ao palco Marful, na sua versom de quarteto. A continuaçom, a festa acelera-se com Ulträqäns, que vam deixar passo à cabo-verdiana Maria Alice. Pechará a noite a atuaçom mais festeira, a altas horas, a cargo dos Cuchufellos.
Serviços
A organizaçom disponibiliza umha zona de campismo de balde com duchas. Para chegar a Salvaterra há linhas regulares de comboio e de autocarro. Na página web da SCD Condado podem-se consultar, ademais, as rotas que chegam a Salvaterra por estrada.
+ Ligaçons relacionadas:
- Informaçom sobre o Festival no Web da SCD Condado (Programa, localizaçom)
- XXIV Festival da Poesia no Condado [PGL, 02/09/2010]
- XXIII Festival da Poesia no Condado [PGL, 04/09/2009]
- XXII Festival da Poesia no Condado [PGL, 01/09/2008]
- XXI Festival da Poesia no Condado [Velho PGL, 23/08/2007]
- XX Festival da Poesia no Condado [Velho PGL, 24/08/2006]
