O ‘consenso’ lingüístico do PP começaria por rejeitar “Galiza”

Maria E. – O ‘consenso’ lingüístico que prometeu Feijóo começaria por “desbotar” o topónimo Galiza para o nosso país e “admitir […] que nos chamamos Galicia“. É a surpreendente exigência realizada polo presidente da Junta ao porta-voz do BNG no Parlamento, Carlos Aymerich.

Num alarde de cinismo, Alberto Núñez Feijóo instou os nacionalistas a cumprirem a Lei de Normalizaçom Lingüística, precisamente num momento em que o seu partido tem promovido diferentes ataques à norma, como no caso da Corunha, onde PP local leva tempo a reclamar a oficializaçom da forma deturpada La Coruña.

Contudo, segundo o presidente da Junta aceitar Galicia seria a primeira condiçom para que existisse esse consenso. Curiosamente, do próprio PP tem-se afirmado que o ‘consenso’ se rompeu durante o governo do bipartido BNG-PSOE. Isto daria para pensar que durante os governos de Manuel Fraga havia ‘paz lingüística’, mas tampouco nessas épocas os nacionalistas aceitárom o topónimo em espanhol.

Foi este o requisito apontado por Feijóo na seqüência de um debate na Câmara galega sobre a questom lingüística, na qual o BNG instou o PP a “paralisar os passos atrás” que os espanholistas teriam dado contra o galego. Porém, o chefe do Executivo autonómico respondeu que a Galiza nom tem de pedir permissom aos nacionalistas para falar em galego, “nem a tem de pedir para falar em castelhano”.

Seja como for, Feijóo assegurou que o novo Decreto do galego será apresentado antes à Real Academia Galega e ao Conselho da Cultura Galega.

O nome do país

Em julho de 2007, a na altura conselheira da Cultura, Ánxela Bugallo, solicitava da Real Academia Galega um ditame em que se resolvesse qual era o nome do País que deviam empregar as instituições autonómicas. Devido à pouca contundência com que a RAG defendeu a inquestionável galeguidade de Galiza, a GZe-ditora decidiu publicar em formato digital um completo trabalho de José-Martinho Montero Santalha para “contribuir mais a esclarecer o debate”.

+ Ligações relacionadas:

• A Galicia institucional vira as costas à Galiza cívica [Velho PGL, 12/08/2008]
• Galiza é o nome da Nossa Terra, artigo de José Paz Rodrigues [Velho PGL, 27/07/2008]
• GZe-ditora publica trabalho de Montero Santalha sobre o nome Galiza [Velho PGL, 10/07/2008]