PGL – O porta-voz em matéria lingüística do BNG, Bieito Lobeira, apresentou à Junta umha pergunta para a sua resposta escrita relativa ao envio de felicitaçons de Natal bilingües espanhol-latim)e com conteúdo religioso por parte do Director da Escola Galega da Administraçom Pública (EGAP).
No documento recibido na redacçom do Portal Galego da Língua, Lobeira destaca que Pablo Figueroa Dorrego, enviou de maneira oficial felicitaçons de Natal «com evidente conteúdo religioso» (católico), com passagens bíblicas incluídas (como Lucas 2,14), pintura de Sam José e a Virgem Maria, e um «curioso sentido do bilingüismo»: latim-espanhol numha das felicitaçons, latim-galego noutra diferente.
Gloria in Altissimis deo, et super terram pax in hominibus bonae voluntatis, é o que afirma umha das felicitaçons (oficial) de Natal. Esta sentença comparte presença com o espanhol, obviando a língua própria da Galiza. Assim, Lobeira conclui que «o galego nom existe. Mas tanto fai. Introduçom do inglês (isso sim, falaz) no ensino, em detrimento do galego. E agora bilinguismo latim-espanhol nas comunicaçons da EGAP».
Atendendo a isto, Lobeira pergunta à Mesa do Parlamento:
1 – Resulta lógico que, com carrego da EGAP, o seu director envie felicitaçons de Natal de conteúdo marcadamente religioso (católico) e num cordial bilinguismo espanhol-latim, sendo como é um centro oficial de docência dependente do Governo galego?
2 – Esta actuaçom será corrigida no futuro?
