PGL – Bieito Lobeira, porta-voz em matéria lingüística do BNG, apresentou à Junta umha pergunta para a sua resposta escrita relativa às comunicaçons oficiais emitidas polo Ministério de Fomento e dirigidas ao Parlamento da Galiza, «em perfeito bilingüismo harmónico (espanhol-inglês)».
Segundo informa o comunicado recebido na caixa dos correios do Portal Galego da Língua, José Blanco, convida a representantes do Parlamento da Galiza e a outras autoridades galegas à jornada Por um mar más limpio y seguro / For a cleaner and safer sea, que decorrerá na Corunha no próximo dia 12 de Fevereiro (12 de Febrero/12th of January no referido convite). «Na nossa modesta e paleta opiniom, ‘febrero’ em espanhol corresponde-se com o inglês ‘february’», destaca Lobeira.
«Desconhece o BNG o processo psico-ideológico e mental que dá pé a que umha pessoa oriunda de Palas de Rei (King’s Cave?), na Galiza, num contexto sócio-lingüístico maioritariamente galego-falante, passe, ao aceder a responsabilidades ministeriais em Madrid, a esquecer tam aginha o idioma próprio do País que o viu nascer, e mesmo a eliminar-lhe o carácter de língua oficial no nome –supom-se- dum ‘moderno’ cosmopolitismo em que só tenhem lugar o inglês e o espanhol», explica o deputado.
Ainda, o BNG denuncia a deturpaçom da toponímia oficial galega, que reconverte o original Fisterra em Finisterre, segundo refere a informaçom que publicita a exposiçom complementária à conferência que decorrerá nesse mesmo dia.
Atendendo a isto, Lobeira pergunta à Mesa do Parlamento galego:
1 – Considera a Secretaria Geral de Politica Lingüística que este bilinguismo com paulatina introduçom do inglês que pratica com tanta soltura o Ministro de Fomento será positiva para derrubar as fronteiras e as limitaçons de umha cultura que, como a galega, padece tal grau de ensimesmamento que provoca, entre outros, problemas de fanatismo ideológico, adoutrinamento de crianças e fracasso escolar?
2 – Considera que este comportamento linguístico será do agrado da tam mentada como indefinida ‘maioria silenciosa’, com a que o Partido Popular, parece ser, mantem fluída interlocuçom e certeira interpretaçom da sua opiniom univocamente emitida?
3 – Tem previsto a Secretaria Geral de Politica Lingüística parabenizar o Ministério de Fomento por esta mostra de infinito galeguismo amável (que nom estéril nacionalismo de confronto) que emana tanto desta como doutras actuaçons em matéria toponímica deste departamento do Governo espanhol que resgata, em sinais de estradas galegas, nomes tam evocadores como os de La Coruña, La Estrada, Puentecesures, Noya, La Guardia, Villagarcía de Arosa etc.?
