PGL – A loja Imperdível incorpora dous novos títulos ao seu cada vez mais amplo catálogo. Trata-se de duas obras publicadas por Edições da Galiza: Filhos da Brêtema, de Artur Alonso Novelhe, e Quero Saber Onde se Agacham as Cores, de Carlos G. Figueiras.
Em Filhos da Brêtema, Artur Alonso Novelhe procura umha comunicaçom direta e efetiva com o leitor, através dumha linguagem poética, com o estilo inconfundível que o carateriza, mas agora acrescentado por umha grande sensibilidade expressiva para dar resposta aos interrogantes com que andamos a conviver na primeira década deste século XXI.
Por um lado a decepçom pola crise que nos cai de cheio, sempre acompanhada de frustraçons e angúrias, mas por outro também, de esperanças para atingir novos objetivos, novos métodos e também novas oportunidades que comportem ilusons e expetativas para mudarmos e construirmos entre todas e todos um mundo mais justo e solidário, onde a globalidade e a multiculturalidade sejam referentes numha sociedade baseada no diálogo, colaboraçom, respeito de todas as culturas e todas as identidades, derrubando qualquer resquício de submetimento e dominaçom cultural ou social e de imposiçons.
Numha globalidade heterogénea e enriquecedora, deixando à margem todo o tipo de desigualdades e dependências. Artur Alonso Novelhe deseja que este contributo poético seja a força necessária para criar umha existência em harmonia perfeita entre cada um de nós e com o nosso entorno. Além disso, o texto está já adaptado ao Acordo Ortográfico.
A outra novidade na loja é Quero Saber Onde se Agacham as Cores, de Carlos G. Figueiras, 
galardoado com o 1º Prémio Internacional “Galescola” de Criaçom de Material Didáctico Infantil. Está dirigido a rapazes e raparigas de 7 e 12 anos de idade. Desenvolve com grande imaginaçom umha série de histórias e peripécias muito interessantes e divertidas que acontecem aos seus protagonistas, Ntiam e os seus amigos do Souto Pequeno.
Entre eles estabeleceram fortes nós de amizade, solidiariedade e respeito, valores fundamentais a desenvolver nestas idades. Propom umha série de questons a que devem procurar soluçons para evitar conflitos e aprender a compartilhar e se relacionarem entre eles sempre de maneira amigável e procurando a harmonia dos componentes deste singular grupo de amigos. Um livro muito necessário na coleçom de qualquer biblioteca escolar.
Ainda, cabe mencionar que o livro conta com ilustraçons do desenhador Leandro Lamas, autor, por exemplo, da representaçom iconográfica do Apalpador.
Preços
Filhos da Brêtema está à venda na loja por 13,50 euros, e a sua aquisiçom outorga um ponto de fidelidade na loja Imperdível. Quero Saber Onde se Encontram as Cores está à venda na loja por 14,50 €, e pola sua compra também se recebe um ponto. Cada ponto de fidelidade tem um valor atual de 0,20 € que pode ser utilizado mais adiante.
+ Ligaçons relacionadas:
