PGL – Aumento de páginas e secçons e nova maqueta. A principal publicaçom galega de orientaçom reintegracionista é desde Janeiro, “mais jornal”. O Novas da Galiza fai em Fevereiro oito anos e oitenta meses consecutivos sem faltar ao encontro mensal com os quiosques.
Com o número 88, em Março, superará também o jornal soberanista que por enquanto tinha publicado mais números: A Fouce. Segundo declarárom responsáveis pola publicaçom soberanista trata-se de um novo salto para, a médio prazo, conseguir tornar a publicaçom quinzenal.
O novo Novas aproveita o aumento de espaço para fornecer aos leitores novas secçons, como AGRO, MAR e ECONOMIA, que neste número se debruçam sobre o problema do preço mínimo do leite, o desemprego em Alfageme e a fusom das caixas respectivamente. Também amplia a secçom de Internacional, chamada agora A TERRA TREME, que inclui umha colaboraçom dedicada aos povos sem Estado assinada por Maurício Castro.
Também ALÉM-MINHO contará com mais espaço, ainda que mais virado para a informaçom do que para os artigos de opiniom. A secçom de notícias passa a chamar-se ACONTECE e nasce umha nova para tratar iniciativas em andamento polo país adiante: DITO E FEITO.
As páginas dedicadas às reportagens subdividem-se agora em A FUNDO, A DENÚNCIA e EM ANÁLISE, que neste número desvendam, respectivamente, a implicaçom policial numha trama de exploraçom de imigrantes, um caso de corrupçom urbanística na Guarda e os excessos do Jacobeu.
A secçom dedicada à discussom de qualquer tema polémico contará a partir de agora com umha página permanente chamada A PALESTRA. Neste número, a nomeaçom de Ferrín como presidente da RAG é submetida a debate.
Também nas últimas páginas fôrom criadas novas secçons, como A EXAME, MEDIA, CULTURA, SAÚDE, WEB, TECNOLOGIA e TEMPOS LIVRES. Nesta última concentram-se três tradicionais colaboraçons do jornal: CONSUMIR MENOS, VIVER MELHOR, ENTRELINHAS e SEXUALIDADE.
A penúltima página será dedicada à AGENDA de actividades que vam decorrer no mês seguinte à publicaçom do Novas, com especial atençom à programaçom dos centros sociais.
O suplemento A Revista nom aumenta de paginas, mas conta com umha nova maqueta que permite a inclusom de mais conteúdos.
+ Ligaçons relacionadas:
