Hoje, quinta feira, 26 de dezembro às 18h, Brincarmos organiza umha sessom de contacontos com Maria da Pontragha com um espetáculo intitulado “Nom tenhas medo à morte” que terá lugar no local da associaçom Artábria, Travessa de Batalhons 7, Ferrol. Umha tarde de contos e humor dirigido a público familiar, com entrada de balde e duraçom aproximada de 50 minutos.
A narradora ordense apresenta a atuaçom do seguinte jeito: “Podes morrer com a risa e também rir com a morte. Nesta sessom nom há tempo de laiar-se nem choromicar. Escuitas os sinos? Escuita, escuita…e se tes medo, peidea forte!”.
María da Pontragha é a alcunha de María Iglesias, umha educadora e antropóloga que sempre mantivo umha ligaçom muito forte com a tradiçom oral, tanto através da música como da própria palavra. Em 2009 iniciou o seu percurso no mundo da narraçom oral apostando na recuperaçom e atualizaçom de histórias populares e da tradiçom oral e com um gosto especial por histórias que se centram no idioma, nas mulheres e na cultura do país. É também é percussionista e vocalista do grupo de tocadoras e cantoras Bouba e do grupo de rock progressivo Lévedo, e ainda reserva um tempo para tocar no grupo mestiço agropunk Sacha na Horta.
Depois do espetáculo de Maria da Pontraga, Brincarmos oferecerá umha chocolatada. Brincarmos nasce por iniciativa dum grupo de famílias da comarca de Trasancos com filhos e filhas galegofalantes. Elas precisam referentes da sua idade para reforçar o galego e manter a sua identidade linguística. A entidade promove um espaço seguro para elas e para a língua. Brincarmos fai parte da Associaçom Artábria e organiza atividades pensadas para crianças e adolescentes.
Brincarmos sabe que o direito à língua própria só pode realizar-se de jeito coletivo. Deseja a oficializaçom real do idioma e, portanto, poder estendê-lo a todos os âmbitos da vida. Num contexto de minorizaçom como o atual, nom chega com ser a língua materna das crianças. Para que o galego poda florescer, é preciso transformá-lo em língua fraterna, de socializaçom, de jogo e aprendizagem entre os pares.
