PGL – O movimento de Nais e Pais polo Ensino en Galego (NPEG) reclamou ontem a adopçom de medidas «para que o decreto de galeguización do ensino se aplique em todos os centros educativos e se ponha fim à situaçom calamitosa pela que passa o idioma próprio de Galiza neste ámbito, especialmente em infantil e primário».
Do colectivo, criado em 1996, criticam «a demagogia dos grupos mais reaccionários da sociedade na sua luita para que o galego desapareça» e acham ‘incrível’ que haja famílias que defendam «o direito a que os seus filhos nom aprendam o galego, como se conhecer a língua própria da Galiza fosse tóxico».
Nesse sentido do NPEG mostram a sua total oposiçom a medidas de segregaçom lingüística promovidas por esses grupos, que «repercutiriam gravemente na convivência de todos os galegos e de todas as galegas».
Lembram ainda que «só desde um preconceito contra o galego se pode dizer que nas matérias impartidas neste idioma o estudantado nom tem por que utilizar o mesmo em exposiçons, exames etc. Seria como se, nas disciplinas impartidas em inglês e francês, o estudantado também pudesse ter um suposto direito individual a fazer os exames em galego ou castelhano».
Do movimento cidadám também recordam que os postulados do decreto de galeguizaçom no ensino fôrom ratificados por diferentes sentenças do Tribunal Constitucional nas quais assinalou que «no ámbito educativo os menores estám enquadrados numa relaçom de sujeiçom especial que nom inclui em caso nengum o direito à ignoráncia de uma das línguas oficiais».
+ Notícias relacionadas:
- O colectivo de Nais e Pais polo Ensino en Galego reclama que se aplique o decreto. A Mesa, 21 de Outubro de 2008.
