PGL – Três militantes da Assembleia da Mocidade Independentista (AMI) terám de declarar no próximo dia 29 de Setembro, segunda-feira, a partir das 11h00 nos julgados de Vigo. Em causa a denuncia apresentada por Galicia Bilingüe no passado mês de Junho acerca da autoria do vídeo Vilingüismo.
Na denuncia apresentada pola associaçom espanholista argumenta-se que o vídeo lançado pola organizaçom independentista no passado Dia das Letras poderia incorrer em várias culpas: ameaças, coacçons, delitos contra a liberdade de expresom e enaltecimento do terrorismo.
Ainda, segundo informa a AMI na sua web, Galicia Bilingüe pede também a retirada do vídeo da internet, bem como o encerramento da página web da organizaçom juvenil. Os fiscais do caso pedem, igualmente, puniçons de até cinco anos para cada pessoa imputada.
Da AMI chamam a «dar resposta a esta denúncia», bem como também a «participar da concentraçom que terá lugar diante dos julgados e à conferência de imprensa que a organizaçom oferecerá antes de prestar declaraçom».
Da organizaçom da mocidade independentista falam em que continuarám a combater o espanholismo, «com as ideias e a nossa energia», e que tentarám «parar o linguicídio contra a nossa língua combatendo as falsas teses bilinguistas». «A nós as citaçons, multas e penas nom nos importam grande cousa, se isso é o que molesta a Galicia Bilingue», afirmam.
O vídeo na rede
A fita de desenhos animados, subordinada ao título Vilingüismo, de quase trinta minutos de duraçom, conta a história de umha vila galega que é invadida por um grupo de alienígenas que querem terminar com o galego e impor o castelhano. Porém, há um grupo de jovens, Antia, Roi, Marinha e Joám, que se oponhem ao hipnótico “bilingüismo harmónico” dos extraterrestres.
A fita pode ser visionada e descarregada da web Gzvideos ou, ainda, do canal terralivre TV.
+ Ligaçons relacionados:
- AMI é denunciada por Galicia Bilingue. PGL, 06 de Junho de 2008.
- Lançam vídeo de desenhos sobre a língua. PGL, 19 de Maio de 2008.
