PGL – Com umha assistência média de mais de cem pessoas, os cinco dias de conferências, cinema e lançamentos editoriais das II Jornadas de Didáctica da Língua organizadas em Ourense pola AGAL, especialmente viradas para o mundo do ensino, desbordárom as previsons mais optimistas.
No primeiro dia foi passado o documentário Fronteiras e a seguir lançado o epistolário Eugénio de Castro e a Galiza, do qual já demos notícia aqui no PGL. Ainda, foi inaugurada a exposiçom de Oliveira Guerra no edifício do Liceu.
No segundo dia, a História da Galiza nas aulas e a apresentaçom do Atlas Histórico enchérom quase por inteiro o Salom Nobre do Liceu ourensano, revelando-se o grande desconhecimento e a tergiversaçom existentes a respeito. O exemplo dos Quadrilheiros irmandinhos foi colocado como mostra disso, num momento em que é debatido o nome da Polícia Autonómica e quase ninguém parece conhecer a existência de referentes históricos de polícia civil na Galiza.
No terceiro dia o professor Eduardo Maragoto protagonizou umha das sessons mais participativas com umha palestra virada para a problemática do ensino em galego. O aproveitamento de textos reais e do português como reforços para o galego, centrárom umha exposiçom que nom deixou ninguém indeferente.
Já no quarto dia Jorge Rodrigues colocou a riqueza das gírias galego-portuguesas, as mais importantes na Europa e ainda com vitalidade, como um dos recursos para desenvolver a criatividade escolar, além do seu valor patrimonial.
Finalmente, umha tertúlia virada para a problemática da língua nas aulas, bem como um recital poético protagonizado pola escritora portuguesa Maria Eulália Fonseca Fernandes, encerrárom as Jornadas no quinto e último dia.
Se bem o próprio José Paz, coordenador principal do evento, reconheceu que o elevado número de inscriçons nas Jornadas foi devido a estarem homologadas pola Junta da Galiza, o certo é que constituem desde já umha das actividades com a assistência mais numerosa de sempre a respeito das organizadas polo movimento reintegracionista.
Queremos lembrar também que outra das actividades com focagem marcadamente reintegracionista, as Jornadas do Ensino da Galiza e Portugal, que se realizárom em Ourense durante a últimas duas semanas, recolhérom igualmente umha grande participaçom, como já aconteceu na ediçom anterior.
A seguir, para ilustrarmos as palavras, disponibilizamos umha pequena foto-reportagem destas II Jornadas de Didáctica da Língua:
