PGL – Santiago de Compostela viverá um fim de semana de teatro lusófono graças à Fundaçom Via Galego, entidade que organiza para os dias 19, 20 e 21 de Dezembro o ciclo Além Minho, que decorrerá na Sala Nasa com a colaboraçom da Concelharia de Cultura.
Segundo apontam de Via Galego o objectivo desta iniciativa «é achegar ao público compostelano e galego as criaçons culturais de países distantes, como Brasil ou Moçambique, e próximos como Portugal, unidos pola ponte da língua. Os bilhetes comprados antecipadamente na web www.salanasa.com terám desconto.
Na programaçom do Além Minho participarám artistas galegos, angolanos, moçambicanos e brasileiros. Já na sexta-feira, às 21h30, o ciclo abrirá da mão da companhia Trigo Limpo, de Tondela (Portugal), que estreia na Galiza a sua obra Chovem amores na rua do Matador, com textos de José Eduardo Agualusa e Mia Couto.
No sábado 20, às 18h00, tempo para o teatro virado para as crianças. A companhia brasileira Mariza Basso encenará A quinta dos objectos, teatro de animaçom para meninas e crianças a partir de três anos.
Finalmente no domingo, a partir das 20h30, chegará à Nasa o quinteto vocal do Porto Vozes da Rádio, para fechar com chave de ouro o ciclo.
Quico Cadaval, patrom da Fundaçom Via Galego e co-organizador do Além Minho, salientou ontem em conferência de imprensa que a escolha da Nasa para a encenaçom destas peças «nom é casualidade, já que esta sala apostou desde o seu nascimento por promover os intercâmbios culturais com os países de fala oficial portuguesa».
A brasileira Mariza Basso, solista da obra A quinta dos objectos, manifestou a sua surpresa por «poder falar aqui em português e encontrar pessoas preocupadas por unir países com uma língua igual». Explicou que na sua representaçom, destinada a meninas e crianças a partir de três anos, se utilizam objectos domésticos, como vasouras ou pentes, para construir bonecos. Segundo Basso, trata-se de «voltar a exercitar a criatividade neste mundo tam mecanizado».
Pola sua banda, Xesús Ron, director da Sala Nasa, manifestou a intençom de estreitar a colaboraçom com Via Galego, que programa por segunda vez em seis meses neste espaço artístico, e continuar a aumentar as actuaçons de artistas da lusofonia.
