Ivo García Álvarez resultou ganhador, com o trabalho “Toponimia menor de Quintana de Fuseros”, do primeiro Concurso de Recolha de Toponímia Oral de El Teixu na Comarca do Berzo, convocado por El Teixu, Rede pal Estudiu y Defensa de la Llingua Asturllionesa. O júri decidiu também premiar com um accessit o trabalho “Mapa de topónimos”, da autoria de José Álvarez González, e dedicado também à localidade de Quintana. Este concurso, organizado com a colaboraçom do Instituto de Estudios Bercianos, e o apoio das associaçons Faceira, Fala Ceibe e o Colectivo Cultural “La Iguiada”, tem o objetivo de premiar a investigaçom sobre a toponímia tradicional da comarca berciana.
O júri deste primeiro Concurso de Recolha de Toponímia Oral de El Teixu na Comarca do Berzo, formado polos investigadores Fernando Bello Garnelo, Héctor García Gil e José Ramón Morala Rodríguez, acordou outorgar o único prémio estabelecido nas bases do concurso ao trabalho titulado “Toponimia menor de Quintana de Fuseros”, assim como conceder um accessit ao trabalho “Mapa de topónimos”. Consultada a secretaria de El Teixu, que previamente se encargara de anonimizar as obras apresentadas a concurso, o ganhador do prémio resultou ser Ivo García Álvarez, e o do accessit, José Álvarez González. Ivo García Álvarez, nado em Igüeña, mineiro de profissom e amador da naturaleza, tem já publicados estudos de recolha da toponímia doutros lugares deste concelho. Como ganhador, vai receber un prémio consistente num diploma acreditativo e um lote de livros de temática berciana e asturo-leonesa. Pola sua banda, José Álvarez González, natural de Quintana e autor em 2009 do Diccionario de Leonés en el alto Boeza y zonas limítrofes, vai receber também livros como premiaçom polo accessit.
Com este concurso El Teixu quer pôr em valor o património que representa a riqueza toponímica, que, esquecida pola administraçom, ainda permanece viva na comarca, como umha mostra mais da cultura berciana que se expressa em galego-português e em asturo-leonês. «A toponímia tradicional é um tesouro de valor incalculável, que é preciso recolher antes que desapareça», assinalam da entidade. A casualidade quijo, ademais, que ambos os dous trabalhos tenham como tema de estudo a toponímia de Quintana de Fuseros, no concelho de Igüeña, «de maneira que com este concurso se avança amplamente no conhecimento dos nomes dos sítios desta localidade berciana», indicam da organizaçom. El Teixu, Rede pal Estudiu y Defensa de la Llingua Asturllionesa é umha associaçom fundada no 2007 por gente da Terra de Miranda, Samora, Leom e Astúrias para defender o asturo-leonês a partir da sua unidade e o respeito às variedades internas. Para isso, desenvolve atividades de estudo, divulgaçom e promoçom por todo o ámbito do idioma.
