PGL – O poeta chairego Manuel Maria Fernandes Teixeiro será homenageado o dia 8 de setembro em Outeiro de Rei, a terra em que nasceu, com motivo do quinto aniversário do seu passamento.
A homenagem começará por volta das 15:00 horas num jantar no que amigos do poeta compartirám mesa com as pessoas que quigerem participar. A seguir à refeiçom, haverá um recital em Penas de Rodas no qual vai ser lembrada a obra do poeta. Umha hora depois, os assistentes achegarám-se até o cemitério de Santa Sabela, situado à beira do Minho, para fazer umha oferenda floral. Novamente, haverá um recital acompanhado polas músicas de Tino Baz, Mini e Mero, Miro Casabella e outros.
Ainda, na jornada de ontem e com motivo da feira literária de Carvalho, o poeta foi homenageado num recital no que partipárom, entre outros, Felipe Seném, Henrique Rabunhal, Jacobo Lamas, Alberto Suras e Estíbaliz Espinosa.
Sempre comprometido com a língua galega, Manuel María foi o sócio número 469 da AGAL posicionando-se inúmeras vezes como defensor do reintegracionismo lingüístico e chegando mesmo a publicar dous livros na norma da associaçom.
Oferecemos a seguir umha mostra da sua criaçom artística, com a que lembramos a um dos poetas mais queridos polo povo galego, mercê ao compromisso demonstrado nos seus 74 anos de vida:
RESURREIÇOM
Os nossos defuntinhos nom morrem.
Nom. Nom morrem.
Jamais perecem.
Fam-se terra lene e doada
que ama, sofre e sonha.
Desde o seu reino silandeiro
os defuntinhos som os que fam
sorrir à Primavera e obrigam
às doces luzes do Outono
a florecer em pétalas
de delicados ouros esvaídos
que recendem a seiva poderosa
e a jovem semente renovada.(Manuel Maria, de A Luz Ressuscitada)
+ Ligaçons relacionadas:
- O telefone para reservar lugar no jantar organizado pola associaçom Xermolos é o 646.413.890
- Carlos Quiroga destaca a Manuel Maria como exemplo da consciência galeguista e contacto português no século XX [Velho PGL, 05/10/2007]
- Manuel Maria: uma viagem pola sua vida e a sua obra reintegracionista [Velho PGL, 09/09/2004]
- Manuel Maria: elegias à tua vida [Velho PGL, 09/09/2004]
- Morreu o poeta chairego Manuel Maria [Velho PGL, 09/09/2004]
- O poeta recebeu homenagem nacional [Velho PGL, 12/10/2004]
- Manuel María na Wikipédia
- Textos, áudio e vídeos na Biblioteca Virtual Galega
