PGL – O bem sucedido «Modelo Burela», que busca fomentar o trilinguismo nesse termo municipal, poder dar mais um avanço, até insuspeitado, ao poder vir a integrar no mesmo o destacamento da Guárdia Civil espanhola sediado na localidade.
No dia de ontem, 26 de Novembro, representantes da Comissom Municipal responsável pola aplicaçom do projecto de dinamizaçom linguística, entre os quais o professor Bernardo Penabade, ex-presidente da AGAL e principal responsável pola redacçom do plano aprovado por unanimidade no concelho marinhao, reunírom com uma representaçom da Guárdia Civil, encabeçada pelo sargento López.
O objectivo da Comissom foi entregar ao representante do corpo militar espanhol na localidade umha cópia do projecto e estudar as possibilidades de colaboraçom para a Guárdia Civil também vir a aplicar o «Modelo Burela».
Lembremos que a benemérita, deixando de lado outras consideraçons, é umha das entidades espanholas mais contrárias à utilização de línguas diferentes do castelhano, prática apoiada nas manifestaçons realizadas em múltiplas ocasions polas suas autoridades e colectivos professionais, sendo que a hipótese apresentada agora em Burela poder vir a implicar um importante avanço no reconhecimento do galego.
O «Modelo Burela» nasceu a partir de um projecto e inovaçom educativa no IES Perdouro, sendo o primeiro na Galiza em fomentar o trilinguismo, na procura da normalizaçom do galego e o reforço, especialmente, do castelhano e inglês.
Os últimos dados estatísticos apontam para os 81% das famílias burelenses galegófonas, sendo que 10% dos jovens da localidade procedem de famílias de fora da Galiza e 9% som famílias mixtas, conforme dados fornecidos pola responsável municipal de educaçom, Lucia Bouza.
+ Notícias relacionadas:
- Bernardo Penabade: ”O Modelo Burela poderia aplicar-se em todo o País”. Velho PGL, 21 de Junho de 2008.
- Burela aprova por unanimidade um modelo de planificaçom lingüística pioneiro na Galiza. Velho PGL, 02 de Maio de 2008.
