Artábria – A Fundaçom Artábria, que tem dedicado importantes esforços desde o início das suas actividades a divulgar e revindicar as ideias lingüísticas de Ricardo Carvalho Calero, recebeu com decepçom, mais um ano, a negativa da RAG a dedicar o Dia das Letras de 2010 a quem foi um dos principais intelectuais do século XX galego.
Nom vamos ocultar essa decepçom, porque há anos que vimos fazendo idêntico pedido à entidade promotora das comemoraçons oficiais dedicadas cada ano a um autor ou autora galega. Sabemos, porque os seus próprios integrantes assim o tenhem reconhecido, que umha parte dessa Real Academia Galega padece a doença do sectarismo, que lhes impede reconhecer o valor de toda umha vida dedicada por Carvalho à nossa língua, à nossa literatura, à nossa cultura e à defesa dos nossos direitos nacionais, com independência do poder político e fiel aos interesses do nosso país.
Na verdade, Carvalho Calero nom necessita o reconhecimento dessas pessoas, cuja altura intelectual e compromisso cívico fica muito aquém do que caracterizou a vida do velho professor, o combatente republicano, o íntegro intelectual ferrolano, galego e universal.
É o povo galego que precisa de dar a merecida homenagem a um autor condenado ao mais injusto ostracismo, primeiro polo franquismo e depois polo novo regime que se seguiu. Castigado polo novo poder autonomista que ele mesmo definiu como “neo-regionalismo” em funçom da sua firme defesa da unidade lingüística galego-luso-brasileira, em harmonia com as tradicionais ideias de Daniel Castelao, de Joám Vicente Biqueira e do primeiro presidente da Real Academia Galega, Manuel Murguia. É por todo isso que a Fundaçom Artábria continuará a reclamar um Dia das Letras para Carvalho Calero.
A nossa entidade, partindo da modéstia dos nossos meios, aproveitará o ano 2010, em que se cumprem cem desde o nascimento de Ricardo Carvalho Calero, para dedicar especiais esforços ao trabalho divulgativo da sua obra e das suas ideias.
Ao mesmo tempo, rendemos público reconhecimento à figura e à obra de Uxio Novoneyra, próximo protagonista do Dia das Letras Galegas em 2010.
+ Ligaçons relacionadas:
