O próximo dia 4 de junho, diante da Casa de Carvalho Calero, às seis da tarde, representantes de um grupo de entidades sociais (Asociación Cultural Ferrolterra Antiga, Sociedade Cultural Medulio, Fundaçom Artábria, Ateneo Ferrolán e Asociación Vecinal de Ferrol Vello) e o porta-voz do BNG no concelho de Ferrol intervirám num ato para reivindicar que a casa de Ricardo Carvalho Calero seja destinada a usos culturais.
Estas entidades assinarom nas últimas semanas um manifesto em que exponhem que havendo diferentes alternativas para a reabilitaçom do imóvel, estas deveriam ser debatidas polos coletivos que durante tantos anos levam reivindicando a figura do intelectual galego e definir assim um plano de usos que fagam o projeto viável para revitalizar o histórico bairro de Ferrol Velho, como também para pôr em valor a figura e a obra do escritor.
Havendo diferentes alternativas para a reabilitaçom do imóvel, estas deveriam ser debatidas polos coletivos que durante tantos anos levam reivindicando a figura do intelectual galego.
Nesta ocasiom apoia também a reivindicaçom e intervém no ato a Rede de Patrimonio Cultural.
Poemas musicados de Carvalho Calero fecharám o ato com a interpretaçom de Xoán Padín.
