Estudantado de secundário à greve pola defesa do ensino em galego

PGL – Os graves incumprimentos que se estám a produzir do decreto 124/2007 de galeguizaçom do ensino, bem como os contínuos ataques contra a nossa língua por parte de grupos galegófobos, som os motivos que levam à convocaçom da greve estudantil no ensino secundário para o dia 26 de Novembro, sob o lema «Paremos as agressons contra o galego».

A greve é convocada pola Mocidade pola Normalización Lingüística (MNL), e conta com os apoios de Galiza Nova e os Comités, organizaçom estudantil maioritária no ensino secundário. Assim foi que manifestárom em conferência de imprensa Fran Rei,  responsável nacional da MNL; Iria Aboi, secretária geral de Galiza Nova; e Marcos Loureiro, responsável nacional dos Comités.

Fran Rei dixo que a Consellaría de Educaçom «torna fácil o caminho aos grupos que atacam o ensino em galego ao nom facilitar os dados sobre o nom cumprimento do decreto 124/2007» e chamou à mobilizaçom pois «o próprio estudantado é consciente desta realidade de nom cumprimento e dele parte esta iniciativa de greve».

Rei recordou que a última grande mobilizaçom polo ensino em galego foi agora há dois anos, em 8 de Novembro 2006, quando mais 60.000 alunos parárom as aulas, segundo os dados da própria Consellaría da Educaçom, pedindo este decreto que agora se tornou «numha legislaçom que se pode passar polo alto sem nenhum tipo de problema».

Iria Aboi sublinhou que para a sua organizaçom é um «acto de coerência» apoiar a greve, acrescentando que «é fundamental que a mocidade galega empregue a língua propia do nosso povo, porém nom é menos que esse uso seja consciente».

Marcos Loureiro salientou que «qualquer reivindicaçom que exigir avanços para a plena galeguizaçom do ensino merece todo o nosso apoio», e mostrou o seu convencimento de que «umha ampla maioria estudantil no país deseja a plena igualdade de trato e direitos para o galego, mesmo estudantes que no dia a dia se expressam em castelhano».