Por terceiro ano consecutivo, o Espaço Clara Corbelhe escolheu a cidade de Ponte Vedra para reunir pensamento e movimentos populares, com o alvo de dar dar sustendo inteletual para a transformaçom social.
Será no mês de outubro, na jornada do sábado dia 5, quando pesquisadoras, militantes de movimentos sociais e políticos de base, acadêmicas e estudantes de todas as áreas de conhecimento se reunam no Paço da Cultura para descobrir “um novo Marx para a Galiza de hoje.”
Na introduçom da sua convocatória, as e os pensadores de Clara Corbelhe admitem que, nos anos posteriores ao socialismo real, “o pensamento marxista perdeu parte do seu caudal e aproximou-se dumha seca”. Porém, desmentindo a morte do marxismo, tantas vezes apregoada pola direita inteletual e política, no Espaço Clara Corbelhe afirmam que “núcleos militantes e pensadoras de todo o globo mantiveram viva a leitura de Marx e vincaram na necessidade de partirmos delas”. Com o duplo alvo declarado de “fortalecer os núcleos galegos de pensamento marxista” e de “importar algumhas das melhores ferramentas e ideias” para a nossa realidade, a jornada dá espaço a um amplo leque de vozes.
Ao longo dum dia que se prevê intenso, as e os ponentes pretenderám abordar questons como a vigência das categorias marxistas, o engarce desta corrente inteletual com a reflexom de sexo-género, a possibilidade de imbrincar a luita ambiental com a superaçom da lei do valor, ou a tradiçom e futuro do diálogo entre independentismo galego e marxismo
A jornada começará com um repasso do papel de Marx no campo inteletual galego, de mao do membro do Espaço Clara Corbelhe Pablo Pesado; Alfredo Macias, a seguir, fará umha nova leitura da Crítica da Economia Política; numha mesa moderada pola estudiosa Daniela Ferrández, Pedro Rey e M. Garea debaterám sobre a sobrevivência do capital através dos corpos; na sessom de tarde, numha mesa moderada por Maria Osório, Júlio Teixeiro e Jacobo Bérgamo estudarám a relaçom de Marx com a questom territorial e a soberania. Para fechar o dia, Iker Jáuregui fará umha leitura guiada do livro “Mute compulsion”, de Soren Mau.
