PGL – A Universidade de Santiago de Compostela acolhe umha nova ediçom de “Encontros do Paraninfo”, na que contarám com a presença do escritor brasileiro João Gilberto Noll e do galego Carlos Quiroga.
Organiçado pola Fundaçom Cultural Hispano-Brasileira e a Vice-reitoria de Cultura da Universidade de Santiago de Compostela em colaboraçom com a Asociaçom de Escritores em Língua Galega, os encontros oferecerám a possibilidade de aprofundar na obra e pensamento de dous autores que representam a nova linha da literatura lusófona.
João Gilberto Noll, nascido em Porto Alegre em 1946, é autor de 13 livros e um dos principais exponentes da literatura brasileira contemporánea. Recebeu vários prémios, entre eles, em cinco ocasions o Prêmio Jabuti, o mais prestigioso do Brasil. O seu romance Harmada figura na lista dos «100 livros essenciais da literatura brasileira».
Por sua banda, o galego Carlos Quiroga, autor de diversos trabalhos de carácter criativo, tem várias obras entre o catálogo de publicaçons da AGAL Editora como a peça de teatro O castelo da lagoa de Antela ou os poemários Gong e O Regresso a Arder. Galardoado em diversas ocasions mercê à qualidade do seu trabalho com prémios como o Carvalho Calero de narrativa ou o Prémio de Teatro Infantil na Monstra de Ferrol, foi também director da prestigiosa revista Agália durante anos. Com todo merecimento, Carlos Quiroga é hoje um referente no espaço literário galego e lusófono.
A programaçom do encontro vinculada ao Programa Escritor Visitante, da FCHB, desenvolve-se em Madrid (dias 21 e 22 de setembro), Salamanca (dia 23), Santiago de Compostela (dia 28) e Barcelona (dia 29).
Cartaz do evento
