PGL – A recentemente constituída editora Edizer Livros, que publica seguindo a norma reintegracionista do galego, vai-se apresentar publicamente este domingo, dia 29 de novembro, na seqüência do AchegArte, a partir das 19h no Palácio de Exposições da Corunha (Palexco).
Como credenciais contam já com umha primeira pubilcaçom no prelo, O dianho e Tom Walker, umha traduçom ao galego do clássico estado-unidense de Washingtong Irving (The devil and Tom Walker).
Sediado em Compostela, Edizer Livros é um projecto editorial alternativo dedicado à publicaçom de obras de ficçom que emprega como veículo a opçom reintegracionista dos parámetros normativos da AGAL, mas para além da reintegraçom lingüística, o projecto aposta polo uso exclusivo de software livre em todo o processo editorial e a publicaçom das obras baixo licenças copyleft.
Com umha primeira ediçom de apenas 200 exemplares, mas com a perspectiva de continuar com a publicaçom de umha traduçom de Edgar Allan Poe, a primeira das obras da editorial distribuirá-se ao preço de 2,50€ nos centros sociais do país, na loja virtual GZfriki.com, ou na sede da editora, sita na Rua Sta. Ugia de Ribeira nº 2 rés-do-chao (A/C 15705 Compostela).
Com o lançamento deste novo selo editorial, os promotores pretendem somar mais um contributo para abrir as portas da lusofonia ao mundo do livro galego, assim como colocar outras opçons normativas dentro do terreno de jogo do contexto editorial do nosso país.
Atendendo à linha editorial, a Edizer convida a participar no projecto a todos aqueles criadores e criadoras, quer sejam escritoras, tradutoras ou o que for, que queiram trabalhar neste ámbito.
Ampla reportagem
As pessoas interessadas neste novo projecto editorial podem saber mais sobre ele através de umha ampla e completa reportagem [PDF] que se publicou a meados deste mês no diário Faro de Vigo. Nela explicam que Edizer Livros pretende «oferecer umha opçom que praticamente nom existe. Há algumhas cousinhas, além da própria editora da AGAL, assim que simplesmente procuramos contribuir um pouco». Isto, sem rejeitar introduzir-se «no mercado português. O galego, de seu, é um mercado difícil, e nós consideramos que o seu futuro está no espaço português».
+ Ligaçons relacionadas:
- Reportagem sobre Edizer Livros no diário Faro de Vigo (12/11/09) [PDF de 762 KB, fonte: suplemento Faro da Cultura]
- Nasce a editora “Edizer Livros”, comprometida com a norma da AGAL [PGL, 04/11/2009]
