Dentro da diversidade de participantes na Leitura o estudantado teve um papel relevante, com a participaçom da comunidade educativa, em particular com adolescentes dos IES de Cotobade, de Cacheiras, do Milhadoiro, a Sangrinha da Guarda, o Eduardo Pondal de Santiago, o Barral de Ponte Areias e o Perdouro de Burela. E também o programa de Estudos Galegos da Universidade do Rio e a Semente de Compostela.
Por outra parte, entre as pessoas que leram trechos do romance, A república dos sonhos, destaca a presença de docentes de distintos níveis educativos. Por exemplo o professor reformado Gerardo Roca, ex-docente de galego e de português, quem declarou para o PGL: “é mui satisfatório ver que há pessoas que se aproximam do português, porque é umha porta que temos aí de cara o mundo e ao que nom podemos renunciar nunca”.
Também participou da leitura a professora da Universidade de Santiago, Carme Villarino, especialista em literatura brasileira e nomeadamente na obra de Nélida Piñon, quem deu os parabéns à AGAL avaliando a iniciativa como “um projeto muito envolvente que aproxima de autores e de obras fazendo partícipes às pessoas, despertando curiosidade e emotividade, é umha proposta espléndida”.
Da mesma faculdade de filologia, achegou-se ao evento o decano, Elias Torres, quem mostrou umha “grande satisfaçom” por participar, destacando “o ato cívico em que a leitura emerge como umha possibilidade de encontro, de participaçom, de comunidade. Vale a pena juntar-se a muitas outras pessoas e comemorar e festejar o que significa umha obra destas características, como a República dos Sonhos, que nos interpela de muitas maneiras”.
Também do nível universitário cumpre salientar a presença do reitor da Universidade de Santiago de Compostela, Antonio López Díaz, quem destacou da iniciativa o “agradecimento polo reconhecimento da autora que foi doutora honoris causa da USC, todo um reconhecimento que temos que seguir mantendo ainda quando ela nom esteja connosco”.
Da Universidade da Corunha, também o reitor, Ricardo Cao, leu seu trecho do romance e declarou ser “um prazer, dar-lhe um pulo à cultura galega e à lusofonia, e estreitar laços entro os distintos países que falamos galego e português”.
Mais um representante do ámbito académico que nom quijo perder a oportunidade de fazer parte da leitura foi Dario Villanueva, catedrático de literatura e membro da Real Academia Espanhola, quem quijo destacar a “qualidade literária” de Nélida Piñon, a quem descreveu como “umha figura extraordinária da literatura, e ademais umha escritora mui vencelhada a Galiza”.
Ateliês para a leitura
Complementando a atividade da leitura, a professora Carme Saborido ofereceu ateliês específicos para as e os estudantes de secudário de cara a aperfeiçoar a leitura de textos em português, incluíndo a achega de brinquedos oferecidos com recursos para a aprendizagem.
