Artábria – Como integrante da mesma desde o início, a Fundaçom Artábria achou importante convocar a Plataforma Galego Sempre Mais de cara à mobilizaçom normalizadora convocada para o dia 18 de Outubro com carácter nacional.
As entidades reintegracionistas convocadas, em regime de autoconvocatória, som todas as integrantes da Plataforma e o lugar da reuniom será o Centro Social do Pichel, em Compostela, no próximo sábado dia 3 de Outubro, às 12h30.
Por parte da Fundaçom Artábria, e à espera do que decidamos conjuntamente, achamos importante que o reintegracionismo de base se manifeste junto a todos os sectores do movimento normalizador que o farám no dia 18.
De facto, a opçom defendida pola nossa entidade sempre foi promover a máxima unidade em torno dos objectivos normalizadores e, se nesta ocasiom nom nos foi possível integrar-nos na plataforma fomentada pola Mesa, foi única e exclusivamente porque, depois de participarmos em duas assembleias, a maioria ligada à UPG impujo umha quota anual de 100 euros para entidades comarcais e 2.500 euros para entidades nacionais.
Foi isso, junto a outras medidas flagrantemente antidemocráticas como a nula autonomia do trabalho local e comarcal, que provocou a saída de nove entidades dessa plataforma. Para maior sarcasmo, posteriormente tivemos conhecimento de que a medida económica foi retirada pola Mesa aginha que tivo certeza de que nom participariam as entidades que considera «incómodas».
Agora, essa plataforma convoca a manifestaçom do dia 18. As misérias do movimento normalizador -que existem- nom devem conduzir-nos à inacçom. É necessário activar-nos e participarmos em todas as iniciativas favoráveis ao galego e contrárias à política de extermínio que dirige o Partido Popular. Por isso é importante que o reintegracionismo se reúna e decida umha estratégia própria para os próximos meses.
Vemo-nos na reuniom deste sábado!!
