PGL – A associaçom cultural A Gentalha do Pichel foi sancionada polo concelho de Compostela com umha multa de “1500 € por colocar um cartaz” na cacharela de sam Joám que dizia “Na Galiza só em galego”. A associaçom afirma que em Compostela,“a liberdade de expressom tem preço: 1800 €”.
Como cada ano este colectivo tramitou a petiçom para realizar a cacharela de Sam Joam, tendo que pedir esta vez ademais umha solicitaçom para pendurar cartazes. Feitas as solicitaçons e após o silêncio administrativo que se interpretou como afirmaçom, as faixas fôrom colocadas e o concelho enviou como resposta umha sançom de 1500 euros por “ocupaçom indevida da via pública” e outra sançom de “300 € por exceder, supostamente, o horário permitido”.
A Gentalha do Pichel é umha associaçom cultural que desde há seis anos dinamiza a vida social e cultural da cidade compostelana oferecendo e reivindicando um lazer alternativo e em galego. Este colectivo trabalha na defesa e conhecimento do meio natural, na recuperaçom da memória histórica da comarca, na defesa da língua e na valorizaçom e conhecemento da nossa cultura tradicional e actual. Neste sentido som já vários anos que tem celebrado a cacharela de Sam Joám em diferentes praças da cidade, além de outras muitas actividades tanto de rua como so seu Centro Social. E também som vários anos vendo como o trabalho feito polas pessoas desta é sistemáticamente entorpecido pola instituiçom municipal, quando nom directamente impedido: negando o uso de praças e espaços públicos, cortando o subministro eléctrico no meio de actuaçons musicais o Dia das Letras galegas…
Nesta ocasiom nom foi menos, de facto fôrom bem mais longe e, “tendo pedidas todas as licenças exigidas”, a Cámara Municipal considerou que pendurar umha faixa com a legenda “Na Galiza só em galego” constituía umha infracçom grave como as recolhidas na Ordenança de lei de tránsito e que atentam contra a segurança vial como: conduçom negligente ou temerária, omissom de socorro em caso de necessidade ou acidente…
Conforme a Gentalha, “este tipo de medidas só podem ser interpretadas como um ataque, e grave, à liberdade de expressom”. Mas, acrescentam, “nom de qualquer liberdade de expressom, já que os centos de bandeiras espanholas penduradas em janelas e varandas durante o mundial, as celebraçons de milhares de energúmenos polas ruas da cidade até altas horas da madrugada e as praças cheias de fanáticos impedindo o tránsito … nom parecem merecer a mesma sançom; parece que isso nom é ‘ocupaçom indevida da via pública’ “.
A conclusom para a Gentalha é clara: “nesta cidade postal, só é legal aquilo que agrada aos turistas; a dissidência de pensamento tem preço”.
Foto: Diário Liberdade
+ Mais info:
