PGL – O grupo parlamentar do BNG apresentou umha pergunta ao governo autonómico para esclarecer os porquês da exclusom do Novas da Galiza dos subsídios à imprensa concedidos pola resoluçom da Secretaria Geral de Meios do passado dia 24 de Julho.
O deputado Bieito Lobeira introduziu a iniciativa no registo do Parlamento no passado dia 30 de Outubro, considerando “escandaloso” que a Junta “prime e premie publicaçons que utilizam de modo maioritário o espanhol” enquanto “excluem outras que utilizam de forma exclusiva o galego”.
O BNG formula cinco perguntas que aludem aos porquês da exclusom do Novas da Galiza pola questom normativa, às previsons para mudar este requerimento na concessom de ajudas públicas e à gravidade da decisom tomada a respeito desta publicaçom tendo em conta a situaçom actual do idioma.
Este grupo parlamentar também realiza umha consulta em relaçom a quais fôrom as outras empresas que ficárom fora das entidades beneficiadas pola Secretaria Geral de Meios -dirigida por Alfonso Cabaleiro Durán e dependente de Presidência- e os motivos que levárom a excluí-las.
No texto da iniciativa parlamentar considera-se “surpreendente” a decisom tendo em conta que as publicaçons em espanhol “com presença residual em galego” recebem quase o triplo da quantia destinada às publicaçons escritas integramente em galego: 2,53 milhons frente aos 971.753 euros que obtém a imprensa monolíngüe.
+ Ligaçons relacionadas:
