PGL – A Agrupaçom Cultural ‘O Facho’ retoma os habituais ciclos de palestras públicas com a presença do professor e doutor em teologia Vitorino Pérez Prieto, que falará na vindoira terça-feira, 28 de Setembro, sobre a influência e relaçom de Prisciliano no nosso povo.
Pérez Prieto (Hospital de Órbigo, Leom) é licenciado em Teologia Dogmática pola Universidade Pontifícia de Salamanca e doutorado em Teologia pola mesma universidade, além de ter realizado estudos de Teologia e Sagrada Escritura na Universidade de Comillas, em Madrid. Aliás, é sacerdote desde 1981, exercendo de pároco até 2006. Na Galiza foi professor de instituto em Burela e na Escola Diocesana de Teologia da diocese Mondonhedo-Ferrol.
Destacou, ademais de pola sua formaçom e actividade puramente religiosa, polas numerosas publicaçons em jornais como El Progreso, Diario de Ferrol ou Faro de Vigo, assim como nas revistas Irimia e Encrucillada. Também foi colaborador d’A Nosa Terra. Tem publicado A xeración “Nós”. Galeguismo e relixión” (1988); “Cristiáns e galeguistas” (1994)“Galegos e cristiáns Deus fratesque Gallaetiae” (1995)“Do teu verdor cinguido. Ecoloxismo e cristianismo” (1997), entre outros muitos volumes. O seu último título é “Prisciliano na cultura galega. Un símbolo necesario“, deste mesmo ano e que se centra no tema da própria palestra.
Também tem colaborado em muitos mais livros, como “O idioma da Igrexa en Galicia” (1989), “Castelao e a verdade dos pobres“, “Manuel María, poeta relixioso” (2001), “A presenza de Deus na última poesía galega” (2006), “A dimensión teolóxica do camiño” (2007), “A Igreja do futuro”, em “Ser Igreja”, Lisboa 2007. Destaca, aliás, por formar parte da Associaçom de Escritores em Língua Galega e da Associaçom de Teólogos Joam XXIII, entre outras associaçons.
Trata-se portanto dumha figura destacada e autorizada para o tratamento dum tema que leva séculos baixo polémica e que ainda hoje nom alcança a provocar umha unanimidade sobre a sua figura, sobretudo desde as hierarquias da Igreja Católica. A palestra começará às 20h no local de Caixa Galicia da rua Medico Rodríguez da Corunha.
+ Ligaçons relacionadas:
- O Facho: Vitorino Pérez Prieto: “Prisciliano como símbolo do povo galego” [O Facho, 20/09/2010]
