O conselheiro de Cultura, Román Rodríguez González, e o presidente da Associaçom Galega da Língua (AGAL) acabam de assinar um convénio de colaboraçom para a dinamizaçom linguística e a difusom cultural no ano 2020, cujas letras som dedicadas ao grande referente intelectual da associaçom: Ricardo Carvalho Calero.
Ao abrigo deste convénio, cujas linhas fundamentais já foram apresentadas em conferência de imprensa no dia 14 de maio, a AGAL compromete-se a realizar o principal projeto expositivo anunciado por enquanto sobre sobre a vida, a obra e o legado de Carvalho Calero “A voz presente”, cuja versom reduzida já começou a itinerar esta semana na vila de Mondonhedo e que pretende chegar a mais 11 localidades, entre elas a portuguesa de Viana do Castelo, se as condições sanitárias o permitirem.
Segundo o convénio, a AGAL também se deve encarregar de elaborar umha página web que recolha os aspetos fundamentais da vida e da obra de Carvalho Calero e cederá gratuitamente a identidade corporativa criada polo artista Pancho Lapeña para que poda ser usada por diferentes organismos públicos e privados ao longo do ano. O convénio menciona ainda outras atividades, como material didático, o projeto documental De Carballo a Carvalho, a lectura continuada de Scórpio e o concurso Musicando Carvalho Calero 2020, adiados por causa da recente crise sanitária, mas dos quais teremos notícias em breve.
