PGL – A Mesa pola Normalizaçom Lingüística solicita transparência ao governo da Junta da Galiza à hora de informar sobre o custo derivado da rejeiçom de livros de texto em galego com motivo da nova legislaçom em matéria de ensino na Galiza.
Na jornada do 24 de Junho o Conselheiro da Educaçom, Jesús Vázquez, negou-se a dar os dados sobre os custos de desbotar milhares de livros por mor do Decretaço. Ante este comportamento, A Mesa reclamou ao presidente da Junta ” transparência e honestidade” sobre este gasto “para as arcas públicas e para as economias familiares”, medida que adjectivam como “um auto de fé contra a língua galega.
Para o presidente da Mesa, Carlos Callón, a atitude da Junta é “lamentável”. Para demonstrá-lo enumerou umha “longa listagem de ataques desde Março de 2009 contra as obras publicadas no nosso idioma”, entre as quais assinala “a destruçom por parte da Conselharia da Cultura de milhares de obras em galego baixo a chuva o passado Dia do Livro, a ordem da Deputaçom de Ponte Vedra de deixar de adquirir volumes em galego para as bibliotecas, o golpe da Conselharia da Cultura contra a rede de traduçons de livros ao nosso idioma, a eliminaçom do incentivo ao galego na conformaçom das bibliotecas escolares, etc”.
Callón concluiu solicitando que Núñez Feijóo “explique quanto dinheiro nos custam a todos os galegos e todas as galegas estes ataques conta a nossa cultura e, ademais, dizer-nos por que lhe molesta tantíssimo que tenhamos umha língua e umha cultura próprias”.
Estimaçons e reflexons acerca do custo da medida
- Associaçom Galega de Editores: 3,8 milhons de Euros
- PSdeG: 10 milhons de Euros
- Carme Adán (BNG): “Haverá que desfazer-se, tirar ou queimar livros de matérias científicas com apenas dous anos de vida”
+ Ligaçons relacionadas:
- Vázquez evita revelar o gasto de substituír libros en galego [Xornal de Galicia, 25/06/2010]
- Pedem a demissom do conselheiro da Educaçom ante o ditame do Conselho Consultivo [PGL, 14/05/2010]
- A Mesa pede à Junta que aclare se vai gastar um milhom de euros em propaganda do decretaço [PGL, 07/05/2010 ]
