PGL – Com o objectivo de evitar uma «involuçom linguística» A Mesa acaba de fazer pública a sua convocatória de manifestaçom, «em defesa da nossa língua própria», marcada para o próximo 17 de Maio em Compostela, e contestar assim as medidas anunciadas polo novo governo do conservador Núñez Feijóo.
A derrogaçom do decreto do galego no ensino e a reorientaçom do projecto das Galescolas constituirám, para a entidade normalizadora, o «primeiro gram passo atrás para a língua desde a chegada da democracia» e «um atentado contra os princípios básicos recolhidos no Estatuto».
Embora a convocaçom da manifestaçom para 17 de Maio esteja já lançada, da Mesa dizem querer ser a «casa comum» em defesa do idioma, e para isso convocam para esta segunda-feira, 9 de março, «uma reuniom aberta a todas associações e colectivos que queiram defendar a língua para definir os próximos passos a dar e conseguir a implicaçom de toda a sociedade galega na marcha polo galego».
No ano 2008 A Mesa já foi responsável pola convocaçom de umha manifestaçom que reuniu vários milhares de pessoas em Compostela sob a legenda «Polo direito a vivermos em galego», manifestaçom contou com participaçom reintegracionista, com a Associaçom Galega da Língua a fazer também convocaçom e lançar o manifesto A Nossa Língua É Internacional.
Por seu lado, outros colectivos estám também a contestar as medidas anunciadas polo governo da direita espanholista. Em destaque o caso da CIG-Ensino, sindicato com importante representatividade no sector educativo, que através de um comunicado salientava que «o futuro presidente [Núñez Feijóo] tem a obriga de desistir das suas intenções, por serem estas impróprias de quem diz que quer ser o presidente de todos os galegos e galegas, caso contrário a CIG-Ensino reactivará acções e iniciativas no âmbito do ensino para impedir esta agressom ao nosso idioma».
