PGL – A Associaçom Cultural ‘A Gentalha do Pichel’ preparou numerosas actividades para comemorar este sábado o Dia da Pátria, mas também para a já tradicional Universidade de Verao, que começará a segunda-feira 27 de Julho.
No próximo 25 de Julho, Dia da Pátria, a associaçom compostelana estará presente em diferentes momentos e espaços da cidade de Compostela:
- De manhá, das 10h00 às 13h00, exporám as novidades de material (bandeiras, camisolas, cuecas, isqueiros, discos…) no passeio central da Alameda.
- A partir das 16h00, a banca de material estará no Parque de Belvis, onde Causa Galiza organiza umha romaria popular. Ali também poderedes ver a exposiçom SINALIZA! durante toda a tarde e desfrutar com os jogos que instalaremos.
- Às 20h00 apresentaremos o FAQ DO REINTEGRACIONISMO, também em Belvis.
- Já à noite, às 22h00, no Pichel, a esperadíssima apresentaçom do GAITA ARMADA
Prima aqui para consultar a FAQ elaborada pola Gentalha do Pichel
Gaita Armada
Como se indica acima, um dos actos do Dia da Pátria é a apresentaçom do disco duplo Gaita Armada, umha compilaçom de músicas populares para serem cantadas nas festas (disco “Gaita”) e outra de músicas patrióticas representativas da nossa história recente (disco “Armada”).
Para a foliada guitarreira em que se celebra a saida à rua do novo CD do Estaleiro do Som participarám o violagambista e cantor ferrolano Xurxo Lois Varela, o músico de transancos (e ex membro de Sairabas) Manolo Bacalhau, a cantora Ana Ribeiro (da Associação José Afonso de Portugal) e ainda mais intérpretes pendentes de confirmaçom.
Segundo a Gentalha do Pichel, Gaita Armada «quer ser ferramenta para umha das mais belas, úteis e nutritivas expressons de umha cultura que teime em continuar a existir: o canto». Nom se trataria do canto de cenários, tampouco do canto da SGAE, mas «do canto de taberna, de descanso no roteiro, de ceia de companheiras, de sobremesa de churrascada, de noite de camaradagem, de barrantes derramado a golpes na mesa. Um canto imperfeito, sem letras nítidas e afinaçom em sol nascente. Umha desordem sonora que sem desprezar a beleza do bem cantado acentue a colectividade».
Os critérios para seleccionar os temas fôrom que as cançons estivessem em galego, fossem de classe, nom sexistas, combativas, cantáveis, populares e femininas. Na festa entregarám-se também uns ‘cadernos’ artesanais (com tapas de madeira) com as letras, para o pessoal animar-se a cantar na apresentaçom.
Da Gentalha lembram que no nosso país o processo de encaixar os distintos elementos da gaita para começar a toca-la chama-se «armar a gaita». Quando está a «gaita armada» começa a festa, «e é a nossa intençom que ademais comece a luita», apontam.
«Umha gaita desarmada pode ter três roncos; pode condenar a cultura ao folclorismo; pode sumerger em formol toda umha etnia. Mas nós queremos que dispare, que descarne e que mutile ao inimigo. Nom queremos música inerte e museística, queremos umha Gaita Armada», similar à Guitarra Armada (1979) dos irmaos sandinistas Carlos e Luis Enrique Mejía Godoy.
Universidade de Verao
E por se os actos para o Dia da Pátria nom fossem poucos, a segunda-feira dia 27 começa a já tradicional Universidade Popular de Verao. Até o dia 31 deste mês haverá diferentes cursos que, pola vez primeira, serám grauitos. A seguir reproduzimos o programa.
Universidade Popular de Verao 2009 (de 27 a 31 de Julho)
Por um ensino além do mercado. Este ano ensinamos de graça.
Telefone de contacto: 646165044 (ligar das 19h00 às 23h00)
PROGRAMA:
segunda-feira dia 27:
18h30 a 20h30 – técnica de pandeireta, para quem sabe um pouquinho: Aitana Cuétara20h30 a 22h30 – gestom de cooperativas: Davide Rodeiro
terça-feira dia 28:
17h00 a 18h30 – jogos bailados para crianças maiores de 5 anos (necessário anotar-se antes no tel. 610669199): Carme Campo
19h00 a 20h30 – elaboraçom de empada: Tamara Garcia
19h00 a 20h30 – massagem e relaxaçom: Noa Tilve
20h00-22h00- iniciaçom às técnicas da rádio: Radio Kalimera
20h00-21h30- primeiros socorros: Joám Duarte
20h30 a 22h00 – montagem de umha pequena mesa de som: Quique Martinsquarta-feira dia 29:
18h00-19h30 – leitura crítica de um jornal: Tamara Montero
19h00 a 20h30 – português oral: Bea Peres
20h30 a 22h30 – introduçom ao Inskape: Denís Fernandez
20h30 a 21h30 – gestom de tempo: Jose Ramom Pichelquinta-feira dia 30:
18h00 a 20h00 – plantas aromáticas: Alberte Momám18h00-19h30 ferramentas informáticas para a Gentalha: Fernando trigo
19h30 a 21h00 – baile tradicional: introduçom ao maneio: Luís Prego
20h00- 21h30 – introduçom à língua gestual: Tareixa Martins
19h30 a 21h00 – introduçom ao Scribus: Tomás González
21h00 a 22h30 – esgrima: espada: Tomás González
21h00 a 22h30- as tripas do teu pc: Denissexta-feira dia 31:
20h00 a 22h00 – segurança na Internet: Denís Fernández
20h00 – roteiro das tabernas pola zona velha de Compostela: comissom gastronómica. Preço: €10 cuncas e €15 cerveja
21h00 a 22h30 – comunica o teu colectivo (notas de imprensa, etc) : David Lombao
+ Ligaçons relacionadas:
