PGL – De 29 de abril a 1 de maio decorre em Alhariz a XXV Ediçom do Encontro Galego-português de Educadores pola Paz. A construçom de umha escola democrática é a tarefa fundamental de um projeto internacional que alcança a vigésimo quinta ediçom desde sua criaçom por Xesús Xares, entre outros, em 1982.
Além de educadoras e educadores da Galiza e de Portugal, está programada também a assistência de educadoras e educadores de outros países, é o exemplo da Espanha e de mais algum, já de costume neste encontro. A vigésimo quinta ediçom aprofunda nas linhas de trabalho resenhadas desde os inícios, mas agora adaptadas aos novos tempos e novos cenários deste século XXI, do qual já levamos umha década imersas e imersos.
Isto entranha novos acontecimentos e novos reptos, polo qual é preciso o estudo, criaçom e troca de alternativas, estratégias e recursos para umha convivência democrática enquadrada numha Educaçom para a paz e liberdade, «ligada sempre a um contexto específico, definido por cada um dos países participantes a desenharem as suas iniciativas e experiências de atuaçom no seu âmbito próprio».
Xesús Xares é um dos criadores e dinamizadores que começou a desenvolver este projeto lá polo ano 1982, através da articulaçom de teoria e prática, investigaçom e experiência, tentando fomentar umha educaçom para a paz e a liberdade no processo educativo. «É preciso estabelecer modelos de formaçom/educaçom e cultura na procura de alternativas solidárias, com o objetivo de criar entre todas e todos o melhor dos mundos possíveis», indicam da organizaçom. É por isso que este encontro serve para analisar, aproximar e incrementar diversos modelos a nível internacional, nacional, comarcal, ou local, procurando elementos comuns, mas também a diversidade enriquecedora de cada país.
A construçom de umha escola democrática é tarefa de todas e todos polo que é imprescindíviel a participaçom em liberdade, o pluralismo, justiça, responsabilidade e solidariedade, onde implementemos formas de intervençom baseadas no livre desenvolvimento das capacidades e potencialidades humanas, como modo de transformaçom e emancipaçom das sociedades atuais.
